Shugaban Ƙasa Bola Ahmed Tinubu ya bayyana cewa gwamnatinsa na kan bakin ƙoƙarin gyara tarin kurakurai da kuma damarmakin da gwamnatocin baya suka yi asararsu wa Nijeriya.
Da yake jawabi a madadin shugaban ƙasar, Kakakin Majalisar Wakilai, Tajudeen Abbas, ya buƙaci ƴan ƙasa da kada su cire tsammani, yana mai cewa zaman lafiya da ci gaba na ci gaba da dawowa a ƙasar. Ya ce: “Wajibi ne ƴan ƙasa su duba manufofin gwamnatin yau, domin ana gyara kurakuran da aka tafka a baya.”
Tinubu ya bayyana hakan ne a ranar Juma’a yayin wata addu’a ta musamman da aka gudanar a Babban Masallacin Ƙasa da ke Abuja domin bikin cika shekaru 66 da samun ƴancin kan Nijeriya. Ya bayyana cewa cika shekaru 66 na nuna cewa ƙasar ta girma, kuma duk da tafiyar ta kasance mai cike da ƙalubale, yanzu tana kan kyakkyawar turba.
Taron addu’ar ya samu halartar manyan jami’an gwamnati, da suka haɗa da Mataimakin Shugaban Majalisar Dattawa Barau Jibrin, da Sakataren Gwamnatin Tarayya George Akume, da gwamnonin jihohi, da ministoci, da mambobin Majalisar Dokoki ta Ƙasa, da kuma shugabannin hukumomin tsaro.
A ƙarshe, Shugaba Tinubu ya buƙaci al’ummar ƙasar da su sake ba wa gwamnatinsa ƙarin dama domin kammala ayyukan alherin da ta fara, yana mai jaddada cewa akwai haske a gaba kuma ƴan ƙasa sun riga sun gama sadaukarwar da ake buƙata domin ciyar da Nijeriya gaba.
