Nijeriya ta samu ƙaruwar hatsarin mota a kwatin farko na shekarar 2026, inda aƙalla mutane 1,347 suka mutu sannan dubbai suka jikkata a haɗurra daban-daban a faɗin ƙasar, kamar yadda sabon rahoton Hukumar Ƙididdiga ta Ƙasa (NBS) ya nuna a ranar Talata.
Rahoton ya bayyana cewa jimillar haɗurran mota 2,720 aka samu tsakanin watan Janairu da Maris na shekarar 2026, wanda ya nuna ƙaruwa da kaso 2.64 cikin ɗari idan aka kwatanta da haɗurra 2,650 da aka samu a daidai wannan lokaci na shekarar 2025.
Ko da yake adadin ya nuna ɗan raguwa da kaso 0.40 cikin ɗari idan aka kwatanta da hatsurra 2,731 da aka samu a kwatin ƙarshe na shekarar 2025, yawan mutuwa da jikkatawa ya nuna cewa har yanzu akwai babbar matsala ta tsaro a kan titunan Nijeriya.
Bisa ga bayanan NBS, manyan haɗurra masu tsanani sun fi yawa a cikin wannan lokaci, inda aka samu haɗurra 1,761 a faɗin ƙasar.
Haɗurran da suka yi sanadiyyar mutuwa sun kai 714, yayin da ƙananan haɗurra suka kai 245.Rahoton ya kuma nuna cewa maza ne suka fi yawa cikin waɗanda suka mutu a haɗurran mota a wannan lokacin da ake magana a kai.
Daga cikin mutane 1,347 da suka mutu, maza 1,076 ne, wanda ya kai kaso 79.88 cikin ɗari na jimillar mace-macen, yayin da mata 271 suka kai kaso 20.12 cikin ɗari.
Haka kuma, maza ne suka fi yawa cikin waɗanda suka jikkata a haɗurran.
