Hukumar Hisbah ta Jihar Yobe ta sanar da cafke wasu mata shida a yayin wani sumame na musamman da jami’anta suka kai domin yaƙi da ayyukan karuwanci da baɗala a birnin Damaturu, babban birnin jihar, a farkon watan Oktoba, 2026.
Kwamandan Hisbah na jihar ya bayyana cewa an gudanar da sumamen ne a wasu gidajen saukar baƙi da maɓoyar da ake zargin ana amfani da su wajen aikata rashin ɗa’a da saɓa wa dokokin addini da na al’umma, biyo bayan bayanan sirri da kuma ƙorafe-ƙorafen da mazauna yankin suka shigar ga hukumar.
Hukumar ta bayyana cewa dukkan matan shida da aka kama na tsare a hannun jami’an Hisbah domin gudanar da cikakken bincike da tantance su. Bayan kammala bincike, hukumar za ta tuntuɓi iyaye da magabatan waɗanda aka kaman domin yi musu gargaɗi da samar musu da dabarun gyaran hali, ko kuma gurfanar da su a gaban kotun Shari’a kamar yadda dokokin jihar suka tanada.
A ƙarshe, hukumar ta Hisbah ta gargaɗi masu gidajen haya da masu otal-otal a faɗin jihar da su daina ba da wurarensu domin gudanar da ayyukan karuwanci da sauran munanan ɗabi’u, tana mai jaddada aniyarta ta ci gaba da aiki tare da jami’an Ƴansanda domin tsaftace jihar daga duk wani aiki da ka iya lalata tarbiyyar al’umma.
