Rundunar haɗin gwiwa ta shiyyar Arewa maso Yamma, wato Operation FANSAN YAMMA, ta samu nasarori masu mahimmanci a fannin yaƙi da ta’addanci a jihohin Zamfara da Sokoto, inda suka fatattaki ƴan ta’adda, suka ceto mutane biyu, sannan suka dawo da dabbobi masu yawa da aka sace.
A cewar wata sanarwa da jami’in yaɗa labarai na rundunar, Kaptan Tamuno Sinivie, ya fitar, an gudanar da waɗannan ayyuka ne a ranar 28 ga watan Oktoba, 2026.
A Jihar Zamfara, jami’an Sector 2 da ke gudanar da sintiri na aiki a kan hanyar Anka zuwa Guruzu suka yi arangama da wani shirin kwanton ɓauna da ƴan ta’adda suka kafa a ɓangarorin biyu na titin. Duk da cewa wani soja guda ya samu raunin harbi yayin gumurzuzun, dakarun sun mayar da martani mai ƙarfi da jajircewa inda suka ci ƙarfin maharan, tare da tilasta musu tserewa da raunuka zuwa cikin daji da kuma dawo da cikakken zirga-zirga ga masu ababen hawa a kan hanyar.
A wani farmakin daban da aka gudanar a ranar a Jihar Sokoto, takwarorin dakarun sun daƙile wani yunƙuri na ƴan ta’adda na satar dabbobi da sace makiyaya a ƙauyen Takasaba da ke Ƙaramar Hukumar Sabon Birni.
Sakamakon bayanan sirri masu inganci, sojojin sun isa yankin da gaggawa inda suka tursasa wa maharan tserewa bayan musayar wuta, sannan suka yi nasarar ceto mutane biyu Malam Sulaiman mai shekaru 50 da Nasiru Sulaiman mai shekaru 14 tare da ƙwato dabbobi 520 da aka yi garkuwa da su, inda daga bisani suka miƙa waɗanda aka ceto ga hukumomin ƙaramar hukumar.
Da yake jawabi kan waɗannan nasarori, Kwamandan Rundunar Operation FANSAN YAMMA, Manjo Janar W.B. Idris, ya yaba da ƙwarewa da jajircewar da jami’an suka nuna a fagen daga, yana mai ƙarfafa musu gwiwa da su ci gaba da kai wa ɓata-gari farmaki ba tare da sanyaya gwiwa ba.
Ya kuma sake jaddada aniyar sojojin na tabbatar da tabbataccen zaman lafiya, tare da yin kira ga al’umma da su ci gaba da ba da haɗin kai ta hanyar bayar da bayanan sirri na gaggawa ga jami’an tsaro domin ci gaba da kare rayuka da dukiyoyin al’umma.
