Gwamnonin jihohin Kano da Kaduna sun buƙaci ’yan jarida da su riƙa gudanar da aikin jarida bisa ƙa’ida da gaskiya, tare da dakile yaɗuwar kalaman ƙiyayya da bayanan ƙarya gabanin babban zaɓen shekarar 2027.
Sun yi gargaɗin cewa kai hare-hare kan ɗaiɗaikun mutane, yaɗa saƙonnin siyasa masu rarraba kai da kuma wallafa labaran da ba a tantance sahihancinsu ba, na iya raunana cibiyoyin dimokuraɗiyya da kuma rage amincewar jama’a da tsarin zaɓe.
Gwamnonin sun bayyana hakan ne ta bakin wakilansu a wajen ƙaddamar da littafin Digital Shift in Nigeria’s Newspaper Industry, wanda Editan Labarai na Rukunin Jaridun LEADERSHIP, Dr Sunday Isuwa, ya rubuta, a Abuja ranar Alhamis.
Gwamnan Jihar Kano, Abba Kabir Yusuf, wanda Kwamishinan Yaɗa Labarai da Harkokin Cikin Gida, Comrade Ibrahim Abdullahi Waiya, ya wakilta, ya bayyana damuwarsa kan yadda kalaman ƙiyayya da kai hare-hare kan mutane ke ƙaruwa a harkokin yaƙin neman zaɓe.
Ya ce irin waɗannan ayyuka ba su da amfani ga dimokuraɗiyya, yana mai jaddada cewa ya kamata gasa ta siyasa ta mayar da hankali kan batutuwan da suka shafi jama’a, maimakon kai hare-hare kan abokan hamayya.
Yusuf ya ce, “Abin da muke gani ba shi da amfani ga dimokuraɗiyyarmu, musamman yadda muke ganin kalaman ƙiyayya da mayar da siyasa ta zama kai hare-hare kan ɗaiɗaikun mutane.”
Haka kuma, Gwamnan Jihar Kaduna, Uba Sani, ya buƙaci ’yan jarida da su tabbatar da sahihancin bayanan da suke samu kafin wallafa su, tare da tabbatar da cewa rahotanninsu na bayar da gudummawa mai ma’ana ga ci gaban dimokuraɗiyya.
Uba Sani, wanda Kwamishinan Yaɗa Labarai na jihar, Alhaji Ahmed Maiyaki, ya wakilta, ya ce wajibi ne ’yan jarida su wuce bayar da rahoton abubuwan da suka faru a lokacin yaƙin neman zaɓe, su riƙa binciken ikirari, tabbatar da gaskiyar bayanai da kuma la’akari da tasirin rahotanninsu ga zaman lafiyar ƙasa.
Ya ce, “A waɗannan zaɓuka, dole ne mu wuce bayar da rahoton abubuwan da suka faru kawai, mu zurfafa bincike, mu tabbatar da gaskiyar bayanai, sannan mu tabbatar da cewa abin da muke wallafawa yana taimakawa dimokuraɗiyya.”
Ya ƙara da cewa, “Yaƙin neman zaɓe zai ƙare. Fastocin ’yan takara za su ɓace. Tabbas, wasu ’yan takara za su yi nasara, wasu kuma su faɗi. Amma a ƙarshen komai, abin da ya fi muhimmanci shi ne wannan ƙasa tamu mai suna Najeriya.”
Gwamnan na Kaduna ya kuma nuna damuwa kan tasirin sauye-sauyen fasaha ga masana’antar jaridu, yana mai gargaɗin cewa raguwar ma’aikatan ɗakunan labarai da sauye-sauyen hanyoyin samar da jaridu na jefa wasu ayyukan kafafen yaɗa labarai cikin haɗari.
Ya buƙaci ’yan jarida da su ƙware a fannoni daban-daban na samar da labarai ta hanyar amfani da kafafen zamani, tare da rungumar sabbin fasahohi, ciki har da basirar na’ura mai kwakwalwa (AI), domin su ci gaba da kasancewa masu amfani a wannan zamani da harkokin yaɗa labarai ke sauyawa cikin sauri.
