Al’ummar Margi da ke Jihar Borno ta yi kira ga Shugaba Bola Ahmed Tinubu da Gwamna Babagana Zulum da su ƙara ƙaimi wajen kuɓutar da ɗalibai 78 da wani malami da aka yi garkuwa da su a garuruwan Mussa da Lassa, cikin Ƙaramar Hukumar Askira/Uba.
Al’ummar ta ce iyalan waɗanda aka sace na cikin damuwa tun bayan faruwar lamarin, yayin da yaran da malamin ke ci gaba da kasancewa a hannun masu garkuwa.
Sakatare na al’ummar, Malla Gadzama, ne ya bayyana hakan yayin taron manema labarai a Abuja ranar Alhamis. Ya ce an sace ɗalibai 43 daga Mussa a ranar 15 ga Mayu, 2026, yayin da aka sace wasu ɗalibai 35 da malami guda daga wata makarantar sakandare da ke Lassa a ranar 26 ga Yuni, lokacin da suke shirin jarabawar ƙasa.
Gadzama ya buƙaci Shugaba Tinubu da ya tattara dukkan kayan aikin tsaro da bayanan sirri da ake da su, tare da tabbatar da haɗin gwiwa tsakanin hukumomin tsaro domin ceto waɗanda aka sace. Ya kuma yi kira ga Gwamna Zulum da ya mayar da batun sakin yaran cikin abubuwan da gwamnatinsa ke ba fifiko, tare da samar da hanyar sadarwa da iyalan domin sanar da su sahihan bayanai kan halin da ake ciki ba tare da kawo cikas ga aikin ceto ba.
Al’ummar ta kuma buƙaci Sanata Ali Ndume da sauran wakilan yankin Askira/Uba da su yi amfani da matsayinsu wajen matsa wa hukumomi su ɗauki matakan da suka dace. Ta kuma nemi a ƙarfafa tsaro a makarantun da ke yankunan da ke fuskantar barazanar hare-hare, tare da samar da taimakon lafiya, na tunani da na ilimi ga yaran idan aka kuɓutar da su.
Gadzama ya yi nuni da sashe na 14(2)(b) na Kundin Tsarin Mulkin Nijeriya na 1999, wanda ya bayyana tsaro da walwalar jama’a a matsayin babban nauyin gwamnati. Ya ce al’ummar ba neman wata alfarma take yi ba, illa tana buƙatar gwamnati ta sauke nauyin da kundin tsarin mulki ya ɗora mata.
Ya buƙaci Tinubu, Zulum da hukumomin tsaro su ci gaba da ƙoƙarin ceto yaran da malamin har sai sun koma hannun iyalansu cikin ƙoshin lafiya.
