Jami’an Rundunar Tsaron Al’umma ta Jihar Zamfara sun kama wani direban mota kirar Golf ɗauke da abubuwa masu fashewa guda 98, kuɗi har Naira miliyan 13, da babura uku, waɗanda ake zargin za a kausu ne zuwa sansanin ‘yan bindiga a ƙauyen Bindin da ke ƙaramar hukumar Maru a jihar.
Sauran kayayyakin da aka samu a hannun wanda ake zargin sun haɗa da kwalaye na sigari, tabar wiwi, da kuma kwalayen ‘ya’yan tuffa (Apple).
Da yake ganawa da manema labarai a Gusau ranar Laraba, kwamandan rundunar, Mohammed Shehu Dalijan, ya bayyana cewa an kama wanda ake zargin mai suna Abubakar Abdullahi ne a kan hanyar Gusau zuwa Dansadau, yayin da yake kan hanyarsa ta zuwa ƙauyen Bindin, inda ya ce yankin ya fi zama mafakar ‘yan bindiga.
A cewarsa, direban na tafiya ne a cikin mota kirar Golf lokacin da jami’an suka tsayar da shi domin bincike.
“Bayan cikakken bincike, an gano abubuwa masu fashewa guda 98, kuɗi har Naira miliyan 13, babura guda uku sabbi a cikin kwalayensu, da tabar wiwi,” in ji shi.
Shehu ya ƙara da cewa wanda ake zargin ya amsa cewa yana kai kayan ne ga masu hakar ma’adinai ba bisa ƙa’ida ba a yankin.
