Jirage mara matuka 500 da masanan fasaha na kasar Sin suka sarrafa, sun gabatar da wani wasa mai ban sha’awa da ya haskaka sararin samaniyar Lilongwe, babban birnin Malawi a ranar Juma’a.
Bikin wanda aka watsa ta kafar talabijin, da ya kuma samu dubban ‘yan Malawi masu kallo a cibiyar taro ta kasa da kasa ta Bingu, ya alamta shekarar musayar jama’a tsakanin Sin da Afrika ta 2026 da kuma cika shekaru 77 da kafuwar Jamhuriyar Jama’ar kasar Sin.
Jiragen sun tashi sama, inda suka samar da jerin hotunan da suka hada da tutocin kasar Sin da na Malawi da muhimman ababen more rayuwa da Sin ta samar da kudin aiwatar da su a Malawi da kuma hoton shugaban kasar Malawi Peter Muttharika, wadanda suka ratsa zukatan al’ummar kasar.
Da yake jawabi yayin bikin, ministan kula da harkokin wajen Malawi, George Chaponda ya ce musaya tsakanin jama’ar kasashen biyu ta taimaka sosai wajen bunkasa tattalin arzikin kasarsa ta hanyoyi da dama. Ya kuma yaba tare da bayyana wasan hasken na jirage mara matuka a matsayin gagarumar nasara, yana cewa irinsa ne na farko a Malawai da ya nuna zurfafar dangantakar da ke tsakanin Sin da Malawi. (Mai fassara: Fa’iza Mustapha)
