An gudanar da babban taron murnar cika shekaru 105 da kafuwar jam’iyyar kwaminis ta Sin JKS jiya Laraba a birnin Beijing. Tun daga jagorantar al’umma don ’yantar da su da samun ‘yancin kan kasar Sin baki daya, zuwa jagorantar Sin a cikin gomman shekaru kawai wajen cimma nasarar mayar da kasar Sin bunkasa masana’antu da kuma kafa wani cikakken tsarin masana’antu. Kasashen yamma sun dauki shekaru daruruwa wajen cimma wannan buri. Idan aka waiwaya baya, JKS ta samu nasarorin ci gaba masu haske.
A halin yanzu, ana kokarin cimma babban burin farfado da al’ummar Sin duba da sauye-sauyen duniya da ba a taba ganin irinsa a shekarun karnin da ya gabata ba. A matsayinta na jam’iyyar mulki mafi girma, kuma mai tasiri a duniya, JKS ba ta canja hanyar da take bi da alkawarin da ta dauka ba, za ta ci gaba da zamanantar da al’ummar Sinawa, da kuma samar da karin kuzari mai kyau ga kokarin tabbatar da zaman lafiya da ci gaban duk duniya baki daya.
Shugaban cibiyar bincike ta Lula ta Brazil, malama Silva ta yi imanin cewa, Sin tana da babban ra’ayi na ciyar da kasashe masu tasowa gaba a harkokin duniya, da kuma ciyar da tsarin kasa da kasa gaba zuwa mai adalci da daidaito, kuma JKS ba wai kawai ta kawowa Sin babban tasiri da ma’ana ba, har ma tana yin tasiri mai zurfi ga tsarin duniya. (Amina Xu)
