Mataimakin wakilin dindindin na kasar Sin a Majalisar Dinkin Duniya Sun Lei, ya yi kira da a magance rikicin Ukraine ta hanyar shawarwari. Sun Lei ya bayyana hakan ne a jiya Alhamis, yayin zaman gaggawa na gama gari, da kwamitin sulhun majalisar ya gudanar kan batun Ukraine.
Jami’in ya kara da cewa, abun da ya fi muhimmanci a bangaren magance hargitsi, da neman zaman lafiya, da kare fararen hula, shi ne kawar da rikici ta hanyar shawarwari. Duk da cewa a kan gamu da matsaloli wajen cimma zaman lafiya, amma tattaunawa ta fi fada, kuma sulhu ya fi yaki.
Sun ya ce kasar Sin tana goyon bayan duk wani kokari da ake yi don samar da zaman lafiya. Tana kuma fatan bangarorin da abin ya shafa za su sake tuntubar juna nan ba da jimawa ba, da ci gaba da tattaunawa, da kuma nuna wa juna aniyarsu ta siyasa, kana su mayar da hankali kan batutuwan tsaro masu nasaba yadda ya kamata, tare kuma da warware su. Hakazalika, bisa ga tushen bin ka’idojin MDD, ya dace a kawar da rikici a zahiri, da kuma yin kokarin cimma yarjejeniyar zaman lafiya mai dorewa, kuma mai amfani a dukkan fannoni.
Baya ga haka kuma, Sun Lei ya ce, Sin za ta ci gaba da yin iyakacin kokari tare da al’ummun duniya, wajen ganin an gaggauta cimma zaman lafiya, kuma an kai ga gaggauta shawo kan rikicin ta hanyar siyasa. (Bilkisu Xin)
