Ɗorin gida ko na gargajiya, na iya jawo mummunan lahani ga tsokoki, jijiyoyin jini, jijiyoyin laka, haɗi da shi kansa ƙashi.
Hakan na faruwa ne, sakamakon katsewar gudanawar jini sakamakon ɗaurin ɗorin.
Lahani na fara faruwa ne daga awa uku zuwa shida bayan ɗaurin da ya katse gudanawar jini a gaba da ɗaurin.
Idan katsewar jini ta zarce, za ta iya haifar da ruɓewar hannu ko ƙafa; wanda daga ƙarshe zai tilasta yanke sashin a asibiti ɗungurungum.
Amma akwai alamomi biyar da za su iya taimakawa wajen gano katsewar gudanawar jini ta faru, sannan kuma hannu ko ƙafa su fara ruɓewa.
Alamomin na fara bayyana ne, tun daga awanni ukun farko da suka haɗa da:
1- Matsanancin ciwo a inda aka yi ɗaurin karayar.
2- Shanyewar hannu ko ƙafa: A yayin da jijiyoyin laka suka samu lahani, hannu ko ƙafa za su shanye; wato rashin ƙwari zai bayyana, sannan mutum ya gaza motsa yatsun hannun nasa ko na ƙafarsa.
3- Gushewar ji a fata: Idan aka taɓa hannu ko ƙafar mutum, ba zai ji ba, ko kuma ya riƙa jin dindiris, sagewa, jin kamar shokin ko kuma kamar ana tsitstsira masa allura.
4- Koɗewa: Hannu ko ƙafa za su koɗe ko kuma su ɗashe, hakan na nuni ga ƙamfar jini a sashen.
5- Ɗaukewar bugawar zuciya: Akwai wasu sassa a jikin mutum da ake iya jin yadda zuciya ke bugo jini zuwa sassan jiki, wato ‘pulse’. A hannu, ana iya jin bugawar zuciya a kan gaɓar gwiwar hannu da kuma tsintsiyar hannu; daidai ƙasan babban yatsan hannu. Haka nan, ana iya jin ƙafa a kan tafin sawu.
Da zarar waɗannan alamomi sun fara bayyana, sai a garzaya zuwa asibiti; domin ceto hannun ko ƙafa daga ruɓewa. Amma idan har aka yi buris da faruwar hakan, daga ƙarshe zai tilasta yanke hannun ko ƙafa a asibiti; wanda kuma yanke wani sashen jikin mutum, na nufin samun nakasa ne kai tsaye.
