Dangantaka tsakanin Sin da Rasha na ci gaba da kara karfi a matsayin daya daga cikin manyan hadin gwiwar siyasa da tattalin arziki a duniya. Tsawon shekaru, kasashen biyu sun gina alaka mai dorewa bisa amincewa da juna, hadin gwiwar makamashi, kasuwanci, tsaro, da kuma goyon bayan juna a manyan batutuwan duniya. Wannan kusanci ya sa Beijing da Moscow ke zama abokan hulda da ke neman tabbatar da zaman lafiya da daidaito a tsarin duniya wanda a yanzu haka yake fuskantar sauye-sauye da ba a taba ganin irinsu ba a karni guda da ya gabata.
Bayan shugaba Xi ya tarbi shugaba Putin da bikin maraba na musamman a wajen zauren al’umma da ke tsakiyar Beijing, shugabannin biyu sun tattauna batutuwan da suka shafi bunkasa kasuwanci, makamashi, fasaha, da hadin gwiwar diflomasiyya.
Masana harkokin siyasa na ganin cewa wannan ziyara wata alama ce ta kudurin kasashen biyu na kara zurfafa alakarsu musamman a wannan sabon zamani da ake fama da sauye-sauyen siyasa da tattalin arziki a duniya.Ziyarar ta kuma zo ce a daidai lokacin da ake gudanar da bikin baje kolin kayayyaki kirar Sin da Rasha karo na 10, inda ’yan kasuwar kamfanonin kasashen biyu ke yaukaka mu’amala a tsakaninsu.
Bikin baje kolin wanda aka fara gudanarwa a shekarar 2014, a bana yana gudana ne a birnin Harbin na Sin, inda yake samun halartar kamfanoni sama da 1500 daga kasashe da yankuna 46 na duniya.
Har ila yau, Sin da Rasha na ci gaba da hada kai wajen karfafa tsarin duniya mai bai wa kowace kasa damar yin tasiri ba tare da mamaya ko kashin dankali daga wata kasa guda ba. Hadin gwiwarsu a fannoni kamar na makamashi, binciken kimiyya, da musayar al’adu na nuna yadda suke kokarin samar da hadin kai mai dorewa. Haka nan, yawaitar ganawa tsakanin Xi Jinping da Vladimir Putin a matsayin shugabannin manyan kasashen biyu na duniya, na kara tabbatar da amincewa da juna a tsakanin kasashensu tare da karfafa dangantakar al’ummomin kasashen biyu.Kasar Sin dai na kara zama cibiyar da ke jan hankalin duniya saboda saurin bunkasar tattalin arzikinta da ci gaban fasaha da kuma gudunmawar da take bayarwa ga raya kasuwancin duniya, da kirkire-kirkire, da kuma shiga a dama da ita tare da sauke nauyin da ke wuyanta a matsayin babbar kasa a duniya ta hanyar gabatar da muhimman shawarwari na warware cukurkudaddun al’amuran duniya a fannin tsaro, inganta shugabanci, bunkasa wayewar kan bil’adama har ma da shiga gaba wajen samar da kyakkyawar makoma ta bai-daya ga dukkannin bil’adama. (Abdulrazaq Yahuza Jere)
