Rundunar Sojin Ruwa ta Nijeriya ta kama wani jirgin ruwa mai suna MT FILIA da ake zargi da satar ɗanyen mai a Jihar Akwa lIbom, a wani sumame da ta gudanar ƙarƙashin Operation DELTA SENTINEL.
A cewar sanarwar da Daraktan Yaɗa Labarai na Rundunar, Kyaftin Abiodun Folorunsho, jami’an rundunar sun kai sumamen ne da safiyar Alhamis, 23 ga Yuli, 2026, bayan samun sahihan bayanan sirri da kuma sa ido na musamman.
Binciken farko ya nuna cewa an kama jirgin ne a tashar UTUE Terminal yayin da ake zargin yana tsotsar ɗanyen mai ba bisa ƙa’ida ba daga wata rijiyar mai. An kuma gano yana ɗauke da tan 32.82 na man fetur da tan 650 na danyen mai ba tare da izini ba.
Rundunar ta ce ta tsare jirgin, ma’aikatansa 12 da kuma kayan da ke cikinsa domin ci gaba da bincike da kuma ɗaukar matakin shari’a idan ya zama dole.
Babban Hafsan Sojin Ruwa, Vice Admiral Idi Abbas, ya yabawa jami’an da suka gudanar da aikin saboda ƙwarewa da jajircewarsu. Ya jaddada cewa rundunar za ta ci gaba da yaƙi da satar ɗanyen mai, da lalata bututun mai da sauran laifukan da ake aikatawa a teku da ke barazana ga tattalin arziƙin ƙasa da tsaro.
Rundunar ta bayyana cewa Operation DELTA SENTINEL na ci gaba da samun nasarori ta hanyar amfani da bayanan sirri, da sa ido mai sosai gami da haɗin gwuiwa da sauran hukumomin tsaro. Ta kuma yi kira ga jama’a da su ci gaba da bai wa jami’an tsaro sahihan bayanai domin taimakawa wajen yaƙi da satar danyen mai da sauran laifukan teku.
