Mataimakin shugaban kungiyar masu noman shinkafa a Jihar Kaduna, Alhaji Hassan Tahir Tanimu (Dan Madamin Samaru), ya ce matsalar kin cika alkawarin biyan bashin da aka yi wa manoma shinkafa a Nijeriya zai iya kawo cikas ga noman shinkafa a wannan damuna da aka shiga.
Alhaji Hassan wanda kuma shi ne shugaban kwamitin karbo bashin da aka yi wa manoman shinkafa daga shekara 2015 zuwa 2025, ya ce gwamnatin tarayya da kuma kamfanonin da suka hadu suka raba bashin sun dauki matakan ba-sani-ba-sabo ga dukkanin wanda aka ba shi bashin amma bai biya ba kamar yadda aka yi alkawari.
Ya ce majalisar tarayya ta yunkura kan batun noman shinkafa da aka ba manoma, kuma nan ba da jima wa ba za a fara daukar matakan da suka dace ga wadanda suka karbi bashin amma ba su biya ba.
A game da matsalolin tsaro da suka addabi wasu kananan hukumomi da suka hada da Giwa da Birnin Gwari da Chukun da kuma Kachiya a Jihar Kaduna, ya ce a damunan bana batun noman shinkafa a wadannan kananan hukumomi ya kankama, babu kama hannun yaro.
Dan Madamin Samaru ya ce hakan ya faru ne a dalilin kokarin da gwamnan Jihar Kaduna, Sanata Uba Sani ya yi na matakan samar da tsaro a wadannan kananan hukumomi.
Alhaji Hassan ya ce duk da matsalolin tsaro da aka samu a kananan hukumomin, Jihar Kaduna ce kan gaba a noman shinkafa a daukacin jihohin da suke Nijeriya.
