Gwamnatin Jihar Sokoto ta bayyana cewa matakin da ta ɗauka na tattaunawa da ƴan bindiga da suka yanke shawarar ajiye makamansu ba yana nufin rauni ba ne, sai dai wata hanya ta dindindin wajen kawo zaman lafiya a jihar.
Wannan na zuwa ne bayan wani mai sharhi a kafafen sada zumunta, Basharu Altine Guyawa, ya soki matakin gwamnatin. Mai ba Gwamna Ahmed Aliyu shawara kan tsaro, Kanal Ahmed Usman (Rtd), ya fitar da sanarwa inda ya kare matakin gwamnatin.
- Sojoji Sun Kashe Na Hannun Daman Bello Turji A Sokoto
- Ya Kuɓuta A Hannun ‘Yan Bindiga Bayan Shafe Kwanaki 8 Yana Gudu A Dajin Sokoto Da Neja
Kanal Usman ya ce Guyawa a baya ya nuna shirin shiga tsakanin gwamnati da masu tada ƙayar baya, don haka ba daidai ba ne ya soki irin wannan yunƙurin. Ya ƙara da cewa gwamnatin Ahmed Aliyu ta rungumi tsari na “a bugu jaki a daki taiki” wato amfani da ƙarfi da kuma tattaunawa — bisa tsarin Soja na “kinetic da non-kinetic” — domin magance matsalar tsaro.
Gwamnati ta ce lardunan da abin ya shafa kamar Rabah, Goronyo, Isa da Sabon Birni na fuskantar mummunan tasiri, inda manoma suka bar gonaki, da kasuwanci ya tsaya, kuma mutane da dama na gudun hijira. Wannan yana jefa jihar cikin matsin tattalin arziƙi da barazanar rashin abinci.
Sanarwar ta bayyana cewa gwamnati na da niyyar dawo da zaman lafiya ta hanyar haɗa shiri na musamman domin karɓar masu tuba tare da tsauraran matakan kulawa da gyaran hali. Gwamnati ta ce hakan ba sassaucin hukunci bane, sai dai dabarar gina zaman lafiya da ci gaba mai ɗorewa.
A ƙarshe, gwamnatin ta bukaci masu sukar matakin da su yi hakan cikin hikima da niyyar gyara, tana mai cewa haɗin kai da fahimta ne kadai za su kai jihar Sokoto ga warware matsalolin tsaro da ta ke fuskanta.
