Gwamnatin Jihar Kano ta tabbatar da rasuwar fitaccen mawakin siyasa, Muhammadu Buhari, wanda aka fi sani da Kosan Waka, yana da shekaru 47 a duniya.
Sanarwar da mai magana da yawun Gwamnan Kano, Sunusi Bature Dawakin Tofa, ya fitar ta ce za a yi jana’izarsa a garin Tsanni da ke Karamar Hukumar Batagarawa, Jihar Katsina, da karfe 5 na yamma in ranar Lahadi 02, ga Augustan 2026.
Gwamna Abba Kabir Yusuf ya mika sakon ta’aziyya ga iyalan marigayin da masoyansa, yana mai bayyana Kosan Waka a matsayin mai kishin kasa wanda wakokinsa suka taka muhimmiyar rawa wajen bunkasa hadin kai da al’adu da wayar da kan jama’a.
Ya kuma yi addu’ar Allah Madaukakin Sarki ya gafarta masa kura-kuransa, ya sanya shi cikin Aljannatul Firdaus, tare da bai wa iyalansa hakurin jure wannan babban rashi.
Marigayi Kosan Waka yana daga cikin fitattun mawakan siyasa a Kano, kuma mai goyan bayan Gwamna Abba Kabir Yusuf da bakandamiyarsa ta ‘Abba ka cika gwarzo, komai ake bukata ka yi…’ wanda ya yi fice wajen amfani da waka wajen isar da sakonni na siyasa da nishadantarwa.
