Wata babbar kotu a Jihar Adamawa ta bayar da umarnin dakatar da tarukan jam’iyyar ADC da aka shirya fara yau, biyo bayan karar da wani shugaban jam’iyyar na bangare, Shehu Yohanna, ya shigar.
Hukuncin ya zo ne a daidai lokacin da rikicin shugabanci ke ƙara tsananta a cikin jam’iyyar a jihar, inda akalla bangarori uku ke ikirarin mallakar tsarin jam’iyyar.
- Kwamitin Zartarwa Na ADC Na Ƙasa Ya Yi Watsi Da Bangaran David Mark Da Bala Gombe, Ya Naɗa Shugabancin Riƙo
- Kamfanonin Hakar Ma’adanai Na Sin Dake Zambia Sun Jinjinawa Manufar Biyan Haraji Da Kudin Kasar Sin RMB
Daya daga cikin bangarorin na karkashin tsohon Sakataren Gwamnatin Tarayya, Babachir Lawal, wanda ake zargin yana goyon bayan tsohon gwamnan jihar, Jibrilla Bindow, domin takarar gwamna a 2027. Wani bangare kuma na tare da Sanata Aisha Binani, yayin da na uku ke karkashin Shehu Yohanna wanda ke cewa shi ne halastaccen shugaban jam’iyyar a jihar.
A wani bangare, tsohon dan majalisar tarayya, Ishaku Abbo, ya sanar da janye kansa daga halartar tarukan, yana zargin shugabancin jam’iyyar da gaza yin tattaunawa mai ma’ana da Aisha Binani kan batun iko da tsarin jam’iyyar.
Haka zalika, Aisha Binani ta yi watsi da sahihancin tarukan da bangaren da ke goyon bayan Babachir Lawal ke shiryawa, tare da bayyana cewa ba za ta halarci tarukan ba, lamarin da ke kara nuna tsanantar rikicin cikin gida a jam’iyyar gabanin zaben 2027.
