Tarzoma ta barke a sassan Amurka da dama, har ta kai shugaban kasar ya bayar da umarnin kama gwamna. An kuma jibge dubban sojoji a birnin Los Angeles, kamar dai yadda jaridar “The Mirror” ta bayyana.
Wani sakamakon kuri’un jin ra’ayin jama’a da kafar CGTN ta kasar Sin ta fitar, ya nuna kaso mai yawa na Amurkawa sun damu da yiwuwar barkewar yakin basasa a kasar. Sakamakon kuri’un jin ra’ayoyin ya nuna cewa, kaso 78.3 bisa dari na ganin a matsayin Amurka ta kasa da ta ginu bisa hadakar bakin haure, kuma a yanzu take aiwatar da akidun yaki da bakin haure, hakan ya saba wa matakan bunkasar kasar bisa tarihi, zai kuma illata alkiblar ci gabanta a nan gaba.
Bisa alkaluman jin ra’ayin al’umma, kaso 87 bisa dari na masu bayyana mahangarsu sun soki lamirin gwamnatin Amurka, bisa yadda take keta hakkokin bil’adama yayin da take tunkarar batun bakin haure. Kazalika, kaso 86 bisa dari na ganin batun bakin haure ya zamo wata babbar matsala ga tsarin jagorancin Amurka a cikin gida. Yayin da kaso 73.8 bisa dari ke ganin la’akari da tsanantar yanayin siyasa, da karuwar gibin tsakanin mawadata da talakawa, rayuwar Amurkawa marasa wadata tana kara tsananta. Har ma suna ganin an zuzuta zargin cewa wai bakin haure dake shiga Amurka ba bisa ka’ida ba sun fantsama a sassan kasar, yayin da kuma sabbin bakin haure dake shiga Amurka ke fuskantar kyama, sakamakon rikicin cikin gida dake ruruwa a kasar. (Mai fassara: Saminu Alhassan)
