Da yammacin yau Laraba, firayin ministan kasar Sin Li Qiang ya halarci bikin bude baje kolin kayayyakin shige da fice na kasa da kasa na kasar Sin, wato Canton Fair karo na 140 a birnin Guangzhou na kasar Sin, tare da gabatar da muhimmin jawabi.
Li Qiang ya bayyana cewa, ta hanyar dandalin baje kolin Canton Fair, duniya ta shaida babban kuzarin da zamantakewa da tattalin arzikin kasar Sin ke da shi. Ya ce kasar Sin za ta ci gaba da inganta ci gaba mai inganci, da fadada bude kofa ga kasashen waje bisa babban mataki, tare da kara zuba kuzari ga tattalin arzikin duniya ta hanyar yin ayyuka masu amfani.
Babbar daraktar WTO Ngozi Okonjo-Iweala ta gabatar da jawabi ta kafar bidiyo, inda ta bayyana cewa gagarumar nasarar da kasar Sin ta samu a fannin ci gaba, ta samar da damammaki masu kyau ga duniya.Bugu da kari, a yau din, Li Qiang ya halarci taron tattaunawa na bikin cika shekaru 70 da fara gudanar da baje kolin Canton Fair a birnin Guangzhou. (Safiyah Ma)
