A lokacin tarukan majalissun NPC da CPPCC na kasar Sin na shekara ta 2025, wakiliya a majalisar wakilan jama’a ta kasar Sin wato NPC, kana shugabar gidan wasan kwaikwayon Min na Fujian, Zhou Hong, ta bayar da wata shawara, wadda ta sa tsohon wasan kwaikwayo na Min ya samu sabon kuzari.
Zhou Hong wadda ta lashe lambar yabo ta wasan kwaikwayo ta Plum Performance ta Sin, ta kwashe shekaru tana taka rawar gani a dandalin wasan kwaikwayo, inda ta mayar da hankali kan abubuwan da suka hana samun ci gaba a fannin, kamarsu rashin isassun masu gadon al’adun gargajiya na wasan kwaikwayo, da rashin ingantaccen tsarin horar da ‘yan wasa matasa… Wadannan matsaloli, tana ganinsu da ido, tana kuma damuwa a zuciya.
Domin sauke nauyin dake wuyanta a matsayin wakiliyar majalissar NPC, a shekarar 2025, yayin taron NPC, Zhou Hong ta bayar da shawarwarin karfafa aikin horar da masu gadon al’adun gargajiya, da kuma kafa cibiyoyin musayar al’adun wasan kwaikwayo na Fujian da Taiwan na musamman. Bayan gabatar da shawarwarin, ma’aikatar al’adu da yawon bude ido da sauran hukumomin da abin ya shafa sun dora musu da muhimmanci sosai, sun kuma sha tattaunawa da ita, kana sun karbi shawarwarinta.
Hakika yadda aka aiwatar da shawarwarin cikin matukar sauri ya ba Zhou Hong mamaki. An shigar da kariya da gadon wasan kwaikwayo na Min cikin ayyukan kare al’adu na lardunan kasar Sin da dama, kuma an inganta tsarin horar da ‘yan wasa matasa. Gidajen wasan kwaikwayo sun fara hada kai da makarantu kusan 20 a duk shekara, kuma yara suna kara fahimtar fasahohin wannan wasan kwaikwayo. “Tabbatar da dimokuradiyyar dake shafar kowa da kowa ba maganar banza ba ce, ana iya ganin yadda ake aiwatar da tsarin a tattaunawar da ake yi, da yadda ake wasu aikace-aikace bisa shawarwarin da aka gabatar, kuma a kowane mataki na aiwatar da manufofin da aka tsara.” Maganar Zhou Hong ta bayyana ma’anar aikin wakilan majalisar NPC.
Labarin Zhou Hong, misali ne na aikin tabbatar da dimokuradiyyar dake shafar kowa da kowa: gwamnati za ta saurara da amsar shawarwarin wakilai, za ta kuma aiwatar da ayyuka bisa shawarwarin a iyakacin kokari. Jama’a suna da hanyoyin bayyana ra’ayoyinsu, kuma gwamnatin za ta kula da bukatunsu. Wannan shi ne ma’ana da fifikon dimokuradiyya irin ta Sin.
A wa’adin shirin raya tattalin arziki da zamantakewar al’ummar Sin na shekaru biyar-biyar karo na 14 (2021-2025), yawan shawarwarin wakilan majalisar NPC da majalisar gudanarwa ta Sin ta karba ya kai 42879, kan adadin shawarwarin da majalisar CPPCC ta gabatar wadanda aka lura da su ya kai 25,789, kuma an dauki matakai bisa wadannan shawarwari cikin lokaci.
Za a gudanar da tarukan shekara-shekara na majalissun NPC da CPPCC a kwanaki masu zuwa. A wannan karo, Zhou Hong tana da sabon tunani. Tana shirin bayar da shawarwari kan kara inganta musayar al’adun wasan kwaikwayo tsakanin babban yankin Sin da yankin Taiwan na kasar, da kuma inganta hadin gwiwarsu a fannonin al’adu da yawon bude ido.
An yi imanin cewa a wannan shekarar da muke ciki, wadda ta kasance shekara ta farko ta aiwatar da shirin raya kasar Sin na shekaru biyar-biyar karo na 15, za a samu karin wakilai da za su gabatar da shawarwari a tarukan majalissun NPC da CPPCC, wadanda za su samar da gudunmowa a yunkurin aiwatar da shirin raya kasar ta Sin. (Mai zane da rubutu: MINA)
