Majalisar Dattawar Nijeriya a ranar Talata ta bukaci a haramta shigo da yadiddika, Atamfofi da shaddoji gaba daya cikin kasar a wani ɓangare na kokarin farfado da masaƙu da ke durkushewa tare da samar da ayyukan yi.
Matsayar ta biyo bayan amincewa da kudirin da Sanata Sunday Katung ya gabatar tare da hadin gwiwar wasu sanatoci da suka hada da Natasha Akpoti-Uduaghan, Adams Oshiomhole, Mohammed Monguno, Ibrahim Khalid da Mustapha Khabeeb.
Da yake jagorantar muhawarar, Katung ya nuna damuwa kan durkushewar masana’antar da a da take daya daga cikin manyan wuraren samar da ayyukan yi a Nijeriya.
Ya tuna cewa, an kafa masaƙa ta farko mai girma a Nijeriya a Kaduna a shekarar 1957, yayin da manufofin gwamnati a shekarun 1960 da 1970 suka taimaka wajen bunkasar masana’antar.
A cewarsa, Nijeriya tana da kusan masaƙu 167 a karshen shekarun 1970 da 1980, waɗanda ke ɗaukar kusan ma’aikata 500,000 aiki.
Discussion about this post