Babban sakataren kwamitin kolin Jam’iyyar Kwaminis ta kasar Sin, kuma shugaban kasar Xi Jinping, da babban sakataren jam’iyyar ‘yan kwadago ta Koriya ta Arewa, kuma shugaban kasar Kim Jong-un, sun amince da kudurin wanzar da gagarumin kawancen gargajiya daga zuri’a zuwa zuri’a tsakanin kasashen biyu.
Shugabannin biyu su amince da wannan matsaya ne a yau Talata, yayin da shugaba Xi ke ci gaba da ziyara a Koriya ta Arewa. A kuma yau din, shugaba Xi da mai dakinsa Peng Liyuan, sun kaiwa hasumiyar kawancen Sin da Koriya ta Arewa ziyarar girmamawa, bisa rakiyar shugaba Kim da uwargidansa Ri Sol Ju.Xi da Kim, sun kuma amince cewa shekarun 1950, lokacin da Sin da Koriya ta Arewa suka yi yaki kafada da kafada, muhimman shekaru ne dake da tasiri a tarihin su. Kuma a wannan rana da safe, Xi Jinping, basa rakiyar Kim Jong-un, ya ziyarci makarantar horar da shugabannin kwamitin tsakiyar jam’iyyar KWP dake birnin Pyongyang.
Xi Jinping da Kim Jong-un sun dasa wata bishiyar fir tare. Bishiyar fir tana kasancewa koriya a duk tsawon shekara, wanda hakan ke alamta dorewar abotar Sin da Koriya ta Arewa. Bayan haka, a gaban manyan shugabannin jam’iyyu da kasashen biyu, Cai Qi da memban dindindin na ofishin siyasa na kwamitin tsakiyar KWP, kuma sakataren tsakiyar jam’iyyar Kim Jae Ryong, sun gabatar da dutsen tunawa da dasa bishiyar. A gaban dutsen, an sassaka manyan kalmomi da harsunan Sinanci da Koriya ta Arewa cewa, “Abota tsakanin Sin da Koriya ta Arewa za ta dauwama har abada”.
Dadin dadawa, Xi tare da uwargidansa Peng Liyuan sun kalli wasan kwaikwayo na musamman a filin wasanni na Pyongyang a wadannan rana bisa rakiyar Kim Jong-un da uwargidansa Ri Sol-ju, tare da jama’ar Koriya ta Arewa. ‘Yan wasan kwaikwayon sun gabatar da wakoki, da raye-raye da sauran nau’o’in fasaha, don maraba da ziyarar da Xi ke yi a Koriya ta Arewa bayan shekaru 7, tare da bayyana begen su na karfafawa, da kuma bunkasa abota da hadin gwiwar gargajiya tsakanin Sin da Koriya ta Arewa.
An kammala wasan kwaikwayon da waka mai jigon “Abota tsakanin Sin da Koriya ta Arewa tana dawwama har abada.” Wakilan bangarorin Sin da Koriya ta Arewa, sun gabatar da furanni da aka aika da sunan manyan shugabannin jam’iyyun kasashen biyu, da kuma masu dakinsu ga ‘yan wasan kwaikwayon, don taya su murnar nasarar gabatar da wasan. (Saminu Alhassan、Amina Xu)
