Majalisar Dattawa na nazarin wani kudirin doka da ke neman hukunta asibitoci da cibiyoyin kiwon lafiya da suka karya ƙa’idojin kula da majinyatan gaggawa, ta hanyar ɗaurin watanni shida a gidan yari ko kuma biyan tarar da ba za ta wuce Naira 300,000 ba.
Kudirin ya kuma tanadi tilasta wa asibitocin gwamnati da masu zaman kansu tantance lafiyar majinyatan gaggawa cikin mintuna 15 da isarsu asibiti, fara ba su kulawar farko domin daidaita yanayinsu cikin mintuna 30, tare da kammala tura su wasu cibiyoyin lafiya cikin sa’o’i uku idan hakan ya zama dole.
Sanata Abdulaziz Yar’Adua ne ya ɗauki nauyin gabatar da kudirin, wanda ke neman yin gyara ga dokar kiwon lafiya ta ƙasa ta shekarar 2014, domin samar da ƙa’idoji masu karfin doka kan kula da majinyatan gaggawa, horar da ma’aikatan lafiya da kuma hanyoyin tura majinyata zuwa wasu cibiyoyin lafiya.
Da yake jagorantar muhawara kan kudirin a zaman Majalisar Dattawa na ranar Laraba, Yar’Adua ya ce gyaran dokar zai magance muhimman giɓi da ke cikin tsarin kiwon lafiyar Nijeriya.
Ya ƙara da cewa manufar kudirin ita ce tabbatar da cewa kowane majinyaci ya samu kulawar gaggawa da za ta iya ceton rayuwarsa a kan lokaci, ba tare da la’akari da ƙabilarsa, arzikinsa, tasirinsa ko inda yake zaune ba
