Gwamnan Jihar Zamfara, Dauda Lawal, ya amince da ɗaukar ƙarin ƙwararrun ma’aikata a sassa daban-daban na Hukumar Tara Haraji ta Cikin Gida ta Jihar Zamfara (ZIRS), a wani mataki na ƙarfafa hanyoyin samar da kuɗaɗen shiga ga gwamnatin jihar.
Sanarwar da Mai Magana da Yawun Gwamnan, Sulaiman Bala Idris, ya fitar a ranar 4 ga Nuwamba, 2026, ta ce hukumar ta fara aikin ɗaukar ma’aikatan ne bisa ƙa’idojin yawan ma’aikatan da ake buƙata da kuma dokokin aikin gwamnati.
Sanarwar ta ce, ɗaukar ma’aikatan na daga cikin ƙoƙarin gwamnatin Dauda Lawal na inganta ayyukan hukumar da kuma ƙara ƙarfin tattara kuɗaɗen shiga na cikin gida domin bunƙasa jihar.
Ma’aikatan da za a ɗauka za su yi aiki ne a fannoni daban-daban da suka haɗa da gudanar da harkokin haraji, ayyukan shari’a, wayar da kan jama’a, yaɗa labarai, ɗaukar hoto da kuma fasahar sadarwa da na’ura mai ƙwaƙwalwa.
An gudanar da rubutaccen jarrabawar tantance masu neman aikin ne a ranar 11 ga Yuli, 2026, inda mutane 484 suka halarta.
Kwamitin da aka kafa domin gudanar da aikin ɗaukar ma’aikatan ne ya tantance amsoshin jarrabawar, ba tare da dogaro da wani ɓangare na waje ba.
A yayin tantance masu neman aikin, an duba cancantar karatunsu da ƙwarewar aikinsu, iya sadarwa, ƙwarewar fasaha, yadda suke gabatar da kansu, halayensu da kuma iliminsu a fannonin daban-daban.
Bayan kammala dukkan matakan tantancewa, waɗanda suka haɗa da tattara sakamakon jarabawa da tabbatar da sahihancinsa, an zaɓi mutane 75 da suka yi nasara domin ba su guraben aikin.
Hukumar Tara Haraji ta Cikin Gida ta Jihar Zamfara ta jaddada cewa an gudanar da zaɓen ne bisa cancanta da ƙwarewar ’yan takara, bin sharuɗɗan da aka sanar tun farko, tantance sahihancin takardun shaidar karatu da ƙwarewa, tare da tabbatar da adalci da gaskiya a dukkan matakan aikin.
