Majalisar Tattalin Arziƙi ta Ƙasa (National Economic Council — NEC) ta amince da wani shirin gaggawa na kwanaki 90 da ke da nufin rage raɗaɗin tsadar rayuwa, da sauƙaƙa farashin kayan abinci, da kuma jawo masu zuba jari a faɗin Nijeriya. Wannan mataki ya samu amincewa ne a ranar Alhamis, 22 ga watan Oktoba, 2026, yayin taron majalisar karo na 161 wanda Mataimakin Shugaban Ƙasa Kashim Shettima ya jagoranta ta hanyar bidiyo.
Shirin, wanda Ma’aikatar Kuɗi ta Tarayya ta tsara, ya ta’allaƙa ne a kan muhimman batutuwa guda biyar: sauƙaƙa farashin abinci, da daidaita tsarin karɓar haraji, da kammala manyan ayyukan da suka fi amfanar talakawa, da kawar da cikas ga masu zuba jari, da kuma tsara ingantaccen tallafi ga iyalai masu ƙaramin ƙarfi. Bugu da ƙari, majalisar ta amince da kafa wata kafa ta musamman ta intanet (national dashboard) domin bibiyar ayyukan ƙasa tare da fayyace yadda ake amfani da kuɗaɗen da aka tara sakamakon janye tallafin man fetur cikin gaskiya da riƙon amana.
A jawabinsa, Mataimakin Shugaban Ƙasa Kashim Shettima ya buƙaci gwamnonin jihohi da hukumomin gwamnati da su tabbatar da cewa alfanun sauye-sauyen tattalin arziƙin Shugaba Bola Ahmed Tinubu shi ne rage kuɗin sufuri, da inganta kiwon lafiya, da samar da ayyukan yi.
Dangane da fannin sufuri, Shettima ya jaddada cewa ya kamata a auna nasarar shirin motocin bas masu amfani da iskar gas (CNG) ta hanyar sauƙaƙa kuɗin mota ga fasinjoji maimakon yawan motocin da aka raba, inda aka amince da tsarin haɗin gwiwar kuɗi tsakanin tarayya da jihohi don bunƙasa motocin CNG da masua amfani da wutar lantarki.
