Majalisar Wakilai ta Tarayya ta fara nazarin wasu muhimman ƙudurorin dokoki da suka shafi harkokin tsaro, da nufin ƙarfafa tsarin rundunonin sojin Nijeriya, inganta walwalar jami’an soja da tsofaffin sojoji, da kuma ƙara wa rundunar ƙarfi wajen tunkarar sabbin barazanar tsaro.
Da yake jawabi a taron sauraron ra’ayoyin jama’a na kwanaki biyu da Kwamitin Tsaro na Majalisar ya shirya a Abuja, Kakakin Majalisar Wakilai, Abbas Tajudeen, ya ce an tsara ƙudurorin ne domin magance sauye-sauyen ƙalubalen tsaro da kuma gina rundunar soja mai ƙarfi da tasiri.
Ya bayyana cewa ƙudurorin sun yi daidai da manufofin Majalisar Wakilai ta 10, kuma suna nuna ƙudirin ƴan majalisa na sake fasalin bangaren tsaron ƙasa.Abbas ya ce sabbin barazanar tsaro kamar fashin teku a yankin Tekun Guinea, yaƙin da damfara a Intanet, da haɗin gwiwar masu aikata manyan laifuka da ƴan ta’adda, sun ƙara nuna buƙatar yin gyare-gyare masu zurfi a fannin tsaro.Daga cikin manyan ƙudurorin da ake dubawa akwai: Dokar Shirin Gonaki da Kiwon Dabbobi na Rundunar Soji, wadda ke da nufin haɗa tsaron abinci da ayyukan soja, musamman a yankunan da ake fama da rikice-rikice.
Dokar Wakilcin Mata a Rundunar Soji, domin ƙarfafa ba mata damar shiga aikin soja da samun wakilci mai kyau.Dokar Rundunar Sojin Nijeriya, wadda za ta soke tare da maye gurbin tsohuwar Dokar Rundunar Soji domin dacewa da yanayin zamani.
Dokar Ƙungiyar Tsofaffin Sojojin Nijeriya, da ke neman inganta walwala da jin daɗin tsofaffin jami’an soja.Kakakin Majalisar ya buƙaci masu ruwa da tsaki, ciki har da jami’an soja masu aiki da waɗanda suka yi ritaya, ƙungiyoyin farar hula, masu fafutukar kare haƙƙin mata, lauyoyi da sauran jama’a da su bayar da gudunmawarsu a wannan tsari na doka.
Tun da farko, shugaban Kwamitin Tsaro na Majalisar Wakilai, Babajimi Benson, ya bayyana taron a matsayin wata muhimmiyar dama ga ƴan ƙasa da masu ruwa da tsaki su bayar da gudunmawa wajen tsara dokokin da za su ƙarfafa tsarin tsaro da kariyar Nijeriya.
Ya ce ƙudurorin sun shafi muhimman fannoni kamar ilimin soja da horar da jami’ai, inganta haɗin gwiwar ayyukan tsaro, kiwon lafiya, bincike da dabarun soja, walwalar tsofaffin sojoji, gyaran tsarin gudanarwa, tsaron abinci da kuma ƙarfafa shigar mata a rundunar soji.
