Wakilin dindindin na kasar Sin a ofishin MDD dake Geneva da sauran kungiyoyin kasa da kasa dake Switzerland Jia Guide, ya gabatar da jawabi yayin taron tattauna batutuwan da suka shafi tsarin jagorancin fasahar AI a matakin kasa da kasa, wanda aka gudanar a ranar Litinin. Taron mai taken “Cike gibin cin gajiyar AI” ya gudana ne yayin kaddamar da taron tattaunawa na kasa da kasa na MDD, dangane da tsarin jagorancin fasahar AI.
A jawabin nasa, Jia ya ce fasahar kirkirarriyar basira ko AI, na matukar sauya akalar ci gaban kasashen duniya da tsarin jagorancin duniya. Kuma ya dace dukkanin sassa su amfana daga gajiyar bai daya ta fasahar tun daga farko, kuma su goyi bayan rawar MDD a matsayin jigon hakan, da mayar da hankali ga gina sanin makamar aiki, da gina makomar fasahohi masu basira, wadanda za su kasance masu game kowa, budaddu, masu wanzuwa, da adalci, da tsaro da karko.
Kazalika, Jia ya jaddada cewa Sin a matsayin kasa dake kan gaba, mai ingiza, da yayata fasahar AI, ta gabatar da shawarar tsarin jagorancin fasahar AI, ta kuma taimakawa kasashe da dama wajen cin gajiyar fasahar. Daga nan sai ya bayyana aniyar kasar Sin, ta karbar bakuncin babban taron kasa da kasa na fasahar AI na shekarar nan ta 2026, da taron manyan jami’ai dangane da tsarin jagorancin AI, tana kuma fatan shigar dukkanin sassa don cike gibin cin gajiya daga fasahar ta AI.(Saminu Alhassan)
