Wani shaida da Hukumar Yaƙi da Yi Wa Tattalin Arziƙi Zagon Kasa (EFCC), ta gabatar ya shaida wa Babbar Kotun Abuja cewa tsohon Ministan Sufurin Jiragen Sama, Hadi Sirika, bai sanya hannu kan takardun wata kwangilar Naira biliyan biyu da aka bai wa kamfanin Tianaero Nigeria Limited ba.
Shaidan, Christopher Odofin, ya ce takardun kwangilar da aka aike wa Hukumar Kula da Sayen Kayayyaki ta Gwamnati (BPP) tsohon Babban Sakataren Ma’aikatar Sufurin Jiragen Sama, Abel Enitan ne, ya sanya hannu a kai.
A yayin da lauyoyin suka yi masa tambayoyi, Odofin, ya ce babu wani bayani a cikin takardun da ke nuna cewa Sirika ya umarci ko ya matsa wa babban sakataren ya amince da kwangilar.
Sai dai ya bayyana cewa bai kamata a bai wa kamfanin Tianaero Nigeria Limited kwangilar ba, saboda an yi rajistar kamfanin ne kusan shekara ɗaya kacal kafin a ba shi kwangilar.
EFCC na tuhumar Sirika da wasu mutane kan zargin almundahana da kwangiloli da suka shafi aikin kafa kamfanin jiragen saman Nijeriya wato Nigeria Air.
Mutanen da ake tuhuma sun musanta zargin, sun ce shirin samar d Nigeria Air ya faro ne tun kafin Sirika ya zama ministan sufurin jiragen saman Nijeriya.
