Shekarar bana ita ce ta cika shekaru 70 da fara kulla huldar diflomasiyya tsakanin Sin da kasashen Afirka, kuma shekara ta farko ta aiwatar da shirin shekaru biyar-biyar na bunkasa tattalin arziki da zamantakewar kasar Sin na 15. A cikin wannan shekara ta musamman, wata yarjejeniya game da harajin kwastam ta zo a kan lokaci kamar yadda aka zata.
Daga yau Juma’a, wato 1 ga watan Mayu, Sin ta fara soke harajin kwastam na tsawon shekaru biyu ga kasashe 20 na Afirka da ke da dangantakar diflomasiyya da ita, wadanda ba su cikin kasashe mafi karancin ci gaba. Ta haka ne za a cimma burin soke harajin kwastam ga dukkannin kasashe 53 na Afirka masu dangantaka da Sin.
To, mene ne manufar ta soke harajin kwastam za ta kawo wa Afirka?Da farko, wannan mataki yana ba wa Afirka kariya don fuskantar kalubale da hadurra.
A halin yanzu, ana kara samun tabarbarewar yanayin siyasa a duk duniya, yayin da ra’ayin ba da kariyar ciniki da na bangaranci ke karuwa.
Saboda haka, kasashen Afirka suna bukatar gaggauta fadada fitar da kayayyaki zuwa ketare da jawo jari daga waje, domin kawar da matsalolin da ke dakile ci gabansu.
Yadda kasar Sin ta soke harajin kwastam ga Afirka a dukkan fannoni ba tare da gindaya wani sharadi na siyasa ba, babu shakka yana ba wa kayayyakin Afirka damar shiga kasuwa mafi girma, kuma yana karfafa gwiwar kasashen Afirka wajen tabbatar da ci gaban tattalin arzikinsu.
Baya ga haka kuma, manufar za ta gaggauta ci gaban kasashen Afirka, duba da cewa hakan zai jawo karin jarin waje zuwa Afirka, baya ga fasahohi da ma kwarewar gudanarwa, wanda hakan zai taimaka wajen sarrafa kayayyaki a kasashen Afirka, sannan a fitar da su zuwa Sin.
Hakan kuma zai taimaka wa Afirka wajen bunkasa masana’antu da zamanantar da aikin gona, ta yadda Afirka za ta rike ragamar ci gaba a hannunta sosai.
Wannan “takardar izini” ta soke harajin kwastam, ba wai kawai ta bude sabon shafi na hadin gwiwar Sin da Afirka ba ne, har ma ta kara wa tattalin arzikin duniya kwarin gwiwa da kuma karfin kuzari, sannan ta sa al’ummar duniya sun fahimci cewa, bude kofa, da hakuri da juna, da samun ci gaba tare, su ne hanya madaidaiciya. (Bilkisu Xin)
