Kungiyar masu gidajen sayar da man fetur, PETROAN, ta bukaci sabon shugabancin NUPENG da ya mai da hankali kan farfaɗo da matatun mai na gwamnati da kuma ƙarfafa haɗin gwuiwa da matatar Dangote domin daidaita samar da mai a ƙasar.
Kiran ya biyo bayan zaɓen Salimon Oladiti a matsayin sabon shugaban NUPENG a wani taron wakilai da aka gudanar a Legas. Shugaban PETROAN, Billy Gillis-Harry, ya ce farfaɗo da matatun mai zai ƙara gasa, da rage dogaro da shigo da mai daga waje, da kuma samar da ayyukan yi.
Kungiyar ta kuma jaddada muhimmancin kyakkyawar alaƙa tsakanin NUPENG da matatar Dangote, tana mai cewa hakan zai taimaka wajen tabbatar da daidaitoa a kasuwa, da kwanciyar hankali a harkokin mai da kuma ci gaban masana’antar mai a Nijeriya.
PETROAN ta nuna ƙwarin gwuiwa ga sabon shugabancin, tana mai cewa zai inganta walwalar ma’aikata da kuma haɗin kai a fannin mai, tare da yaba wa tsohon shugaban Williams Akporeha bisa gudunmawar da ya bayar wajen tabbatar da zaman lafiya da cigaba a masana’antar.
Discussion about this post