Dan wasan gaban Real Madrid Kylian Mbappe ya kafa sabon tarihi a gasar zakarun Turai a wasan da suka doke abokiyar karawarsu Olympiacos ta kasar Girka a wasan Mako na 5 na gasar, tsohon dan wasan na PSG da Monaco ya zura kwallo 4 rigis a wasan na ranar Laraba yayin da Real Madrid ta samu nasara da ci 4-3.
Mbappe ya kafa tarihin zama na biyu da ya zura kwallo uku a cikin ƙanƙanin lokaci a gasar ta zakarun turai, inda ya jefa kwallo uku (Hatrick) a cikin mintuna 6 da dakika 42 kacal, Muhammad Salah ne na farko da ya taba zura kwallo uku a cikin mintuna 6 da dakika 12 a tarihin gasar,
Kylian Mbappe kuma ya jefa kwallaye 64 a gasar zakarun Turai, inda yake bayan Raul Gonzalez (71) a matsayi na biyar na jadawalin wadanda sukafi zura kwallaye a gasar, Ronaldo ne na daya da kwallo 140, Messi 129, Lewandowski 105, Benzema 90 su ne ke kan gaba, masu masaukin bakin na Girka sun fara cin kwallo ba zato ba tsammani ta hanyar bugun yadi 20 na Francisco Chiquinho.
Wannan nasarar ta kawo karshen wasanni uku ba tare da nasara ba ga Madrid a dukkan gasa, kuma wannan ce nasarar farko a gasar da suka yi akan kungiyar ta birnin Athens a ziyararsu ta 10, yanzu haka su ne na biyar a kan teburin gasar Zakarun Turai, maki uku tsakaninsu da Arsenal da ke kan gaba, yayin da masu masaukin baki na Girka ke matsayi na 33 da maki biyu.
