Ɗan takarar shugaban ƙasa na jam’iyyar NDC, Peter Obi, ya yi alƙawarin dawo da tallafin man fetur idan aka zaɓe shi a matsayin shugaban ƙasa a zaɓen 2027.
Obi ya bayyana hakan ne a ranar Litinin a wani taro da aka gudanar q Sakkwato.
Ya ce gwamnatinsa za ta fara da yaƙi da cin hanci da rashawa, wanda ya bayyana a matsayin ɗaya daga cikin manyan matsalolin Nijeriya.
Obi ya ce, “Idan muka kawar da cin hanci da rashawa, ina tabbatar muku cewa za mu dawo da tallafin mai.”
Ya kuma yi alƙawarin amfani da dukiyar ƙasa wajen inganta tsaro, ilimi da sauran muhimman fannoni.
Ya ce ilimi zai kasance abin da zai fi bai wa fifiki bayan haɗin kan ƙasa da tsaro.
Haka kuma, Obi ya yi alƙawarin haɗa dukkanin manyan biranen jihohi da layin dogo domin bunƙasa harkokin kasuwanci da ci gaban tattalin arziƙi.
Mataimakinsa a takarar shugaban ƙasa, Rabiu Kwankwaso, ya ce sun je Sakkwato ne domin tattaunawa da al’ummar jihar da kuma neman goyon bayansu gabanin zaɓen 2027.
Kwankwaso ya ce rashin tsaro, musamman hare-haren ’yan bindiga da satar mutane a Arewa maso Yamma, na daga cikin manyan matsalolin da ƙasar ke fuskanta.
Ya ce jam’iyyar za ta yi aiki wajen magance matsalolin tsaro da tattalin arziƙi idan aka zaɓe su.
Ɗan takarar gwamnan jihar Sakkwato na NDC, Shamsudeen Haido, shi ma ya yi alƙawarin samar da shugabanci na gari, yayin da shugaban jam’iyyar na jihar, Bello Yabo, ya ce taron ya bai wa al’umma damar jin tsare-tsaren ’yan takararsu kai-tsaye.
