Hukumar wasanni ta kasa (NSC) ta gudanar da zabe cikin nasara tare da kaddamar da sabbin kwamitocin hukumar wasannin masu bukata musamman ta Nijeriya, inda ta bukaci sabbin shugabannin da su zage damtse wajen kawo sauyi da kuma kokarin ganin burin NSC na Sabunta Fata a bangaren wasanni ya cika.
NSC ta kuma kaddamar da shirin sabunta fata a bangaren tattalin arzikin wasanni da ake kira ‘Renewed Hope Initiative For Nigeria Sports Economy (RHINSE)’.
An bayyana zaben, wanda ya shafi kungiyoyin Para Sports da dama a matsayin wanda aka yi cikin lumana da kwatanta adalci, inda aka samar da sabbin shugabanni a bangaren Para Football, Para Powerlifting, Para Soccer, Para Swimming, Para Volleyball da Para Badminton.
A bangaren kwallon kafa, an zabi tsohon kwamishinan wasanni na Jihar Bayelsa Opukiri Michael a matsayin Shugaba, yayin da Joshua Dauda Bungon ya zama mataimakin Shugaba.
A bangaren guje-guje da tsalle-tsalle, an zabi Etti Rafiu Olawale a matsayin shugaba, tare da Mohammed Musa Nafiu a matsayin mataimakin Shugaba, sai bangaren daukar nauyi, wakilai sun zabi Kingsley James Awodi a matsayin Shugaba, yayin da aka zabi Chief Akutekwe Patrick (MON) a matsayin mataimakin shugaba.
Wasan kwallon kafa na yashi da aka zabi Alhaji Kaka Mallam a matsayin Shugaba, inda Sherifat Bola Araoye ta zama mataimakiyar Shugaba.
Da yake jawabi a lokacin bikin rantsar da su, Shugaban NSC, Mallam Shehu Dikko, ya bayyana kungiyoyin wasannin a matsayin tushen ci gaban wasanni na Nijeriya, kuma ya bukaci sabbin kwamitocin da aka zaba da su mayar da hankali wajen ganin sun fitar da kitse wuta a bangarorin da aka basu shugabanci, ya kuma kara da cewa Shugaba Bola Ahmed Tinubu, GCFR, ya ci gaba da jajircewa wajen sauya bangaren wasannin Nijeriya.
