Ƙungiyar ƙwallon ƙafa ta mata ta Paris Saint-Germain (PSG) ta tabbatar da cewa za a yi wa kyaftin ɗin Super Falcons ta Nijeriya, Rasheedat Ajibade, tiyata bayan ta samu rauni a lokacin da take wakiltar ƙasar. Ɗan wasan gaban mai shekaru 26 ta samu raunin ne a wasan da Nijeriya ta doke Comoros da ci 5-0 a zagaye na biyu na neman gurbin shiga gasar Olympics ta 2028.
An buga wasan ne a filin wasa na Remo Stars da ke Ikenne, Jihar Ogun. An cire Ajibade daga wasan a minti na 23, inda aka maye gurbinta da Folashade Ijamilusi. Duk da rashin kyaftin ɗin a filin wasa, Super Falcons ta ci gaba da taka rawar gani har ta samu nasara da ci biyar babu ko ɗaya.
A cikin sanarwar da ta wallafa a shafinta na intanet, PSG ta bayyana cewa Ajibade na ƙarƙashin kulawar babban likitan ƙungiyar yayin da take samun kulawar lafiya bayan raunin da ta samu. Ƙungiyar ta kuma tabbatar da cewa za a yi mata tiyata nan ba da jimawa ba, wadda ɗaya daga cikin manyan likitocin ƙungiyar zai gudanar.
Bayan tiyatar, ana sa ran Ajibade za ta fara zaman jinya da kuma murmurewa ƙarƙashin kulawar tawagar likitocin PSG. Sai dai ƙungiyar ba ta bayyana tsawon lokacin da za ta ɗauka kafin ta dawo taka leda ba.
Raunin ya zama babban koma-baya ga Super Falcons, kasancewar Ajibade na daga cikin muhimman ’yan wasan ƙungiyar kuma ita ce kyaftin ɗinta. Rashin kasancewarta a wasannin da ke tafe na iya shafar shirye-shiryen Nijeriya na neman gurbin shiga gasar Olympics ta 2028, gwargwadon tsawon lokacin da za ta ɗauka kafin ta murmure.
