Tsohon mai magana da yawun tsohon Mataimakin Shugaban Ƙasa Farfesa Yemi Osinbajo, Mista Laolu Akande, ya ƙaryata iƙirarin da tsohon Sakataren Gwamnatin Tarayya (SGF) Babachir Lawal ya yi, yana mai bayyana cewa tsohon Shugaban Ƙasa Muhammadu Buhari ya yi tayin mara wa Osinbajo baya a takarar shugaban ƙasa har sau huɗu kashi daban-daban gabanin babban zaɓen 2023.
Da yake mayar da martani kan wata hira da Babachir Lawal wanda a yanzu babban jigo ne a Jam’iyyar ADC ya yi inda ya yi zargin cewa Buhari bai so Osinbajo ya nemi takarar shugaban ƙasa ba, Akande ya bayyana cewa iƙirarin ƙanzon-kurege ne. Ya bayyana cewa Buhari da kansa ya tambayi Osinbajo aƙalla sau huɗu yana mai cewa, “Idan ban mara maka baya ba, wa zan mara wa baya?”, wanda ke nuna yadda tsohon shugaban ya nuna goyon bayansa ƙiri-ƙiri.
Akande ya ƙara da cewa a lokacin yaƙin neman zaɓen fidda gwani na Jam’iyyar APC a shekarar 2022, Shugaba Buhari ya yaba wa Osinbajo a bainar jama’a a gaban ɗaukacin mambobin Majalisar Zartarwa ta Ƙasa (FEC) kan yadda ya gudanar da kamfen ɗinsa cikin ladabi da mayar da hankali kan muhimman batutuwan ci gaba. Ya jaddada cewa shugaban da ya ɗauki wannan mataki a hukumance ba zai yiwu a ce bai so Osinbajo ya shiga fafatawar ba, sai dai ma ƙarfafa masa gwiwa da yabonsa da ya yi.
Haka kuma, Akande ya caccaki matsayin Babachir Lawal na yin tsokaci a kan al’amuran da suka shafi ofishin Osinbajo, yana mai nuni da cewa an tsige Lawal daga muƙamin SGF kafin a ɗauki yawancin matakan da yake magana a kai, don haka bai san abubuwan da suka wakana a cikin ofishin ba, saɓanin shi Akande da ke halartar wuraren da ake yanke muhimman shawarwari a matsayinsa na hadimin Osinbajo.
Idan za a iya tunawa, Farfesa Yemi Osinbajo ya fafata a zaɓen fidda gwani na shugaban ƙasa na APC a watan Yunin 2022, inda ya zo na uku da ƙuri’u 235 a bayan Shugaba Bola Ahmed Tinubu da ya lashe zaɓen da ƙuri’u 1,271 da kuma tsohon Ministan Sufuri Rotimi Amaechi da ya samu ƙuri’u 316. Wannan sabuwar gardama na zuwa ne a daidai lokacin da jiga-jigan siyasa ke ci gaba da sake lissafin tasirin tsoffin shugabannin gabanin babban zaɓen 2027.
