Kamfanin Chevron ya sake jaddada ƙudurinsa na tallafa wa ƙoƙarin kawar da cutar zazzabin cizon sauro a Afirka, yayin da masana kiwon lafiya na duniya suka yi gargadin cewa ci gaban da aka samu na fuskantar tangarɗa duk da shekaru da aka shafe ana yaƙi da cutar.
Darakta Janar na Hukumar Lafiya ta Duniya (WHO), Tedros Adhanom, ya ce yaƙin cutar na cikin mawuyacin hali, inda ya nuna cewa har yanzu tana kashe mutum guda a kowane minti, musamman a yankin Afirka.
Rahoton Malaria na Duniya ya nuna cewa an samu ƙarin yawan masu kamuwa da cutar zuwa miliyan 282 a shekarar 2024, yayin da mace-mace suka kai 610,000, mafi yawansu a yankin Afirka.
Ranar Zazzabin Cizon Sauro ta Duniya, wadda ake yi duk shekara a ranar 25 ga Afrilu, na nufin ƙarfafa wayar da kai da kuma buƙatar saka hannun jari mai ɗorewa, inda taken bana ke nuna bukatar ɗaukar mataki cikin gaggawa.
Chevron ta bayyana cewa tana aiki tare da gwamnatoci da ƙungiyoyin lafiya na duniya wajen inganta hanyoyin rigakafi, da magani da tsarin kiwon lafiya a ƙasashe kamar Nijeriya, Equatorial Guinea da Kamaru. Kamfanin ya ce yana tallafa wa rabon gidajen sauro masu magani, horas da ma’aikatan lafiya da kuma shirye-shiryen wayar da kan jama’a, musamman a yankunan da yake aiki kamar Neja Delta.
Har ila yau, kamfanin ya nuna irin gudunmawar da yake bayarwa a shirin kawar da cutar a tsibirin Bioko, wanda aka fara sama da shekaru 20 da suka wuce, tare da samun yabo a shekarar 2025. Chevron ta ce za ta ci gaba da zuba jari a ilimi, kiwon lafiya da haɗin gwiwa da hukumomi domin rage yaduwar cutar da inganta rayuwar al’umma a fadin Afirka.
