Gwamnan jihar Kwara, AbdulRahman AbdulRazaq, ya gudanar da taro a ranar Talata da manyan sarakunan gargajiya na jihar, inda suka tattauna batutuwan da suka shafi jihar da suka hada da tabbatar da zaman lafiya da tsaro.
Taron, a cewar wata sanarwa da babban sakataren yada labarai na gwamnan, Rafiu Ajakaye, ya fitar a ranar Talata, ya mayar da hankali ne kan ci gaban tattalin arziki da inganta tsaro na rayuka da dukiyoyi.
- Sojoji Sun Harbe Mutane Biyu Har Lahira Da Ake Zargi Ɓarayin Mota Ne A Filato
- Babu Wata Tattaunawa Tsakanin Sin Da Amurka Game Da Batun Haraji
An ruwaito gwamnan yana cewa, “Gwamnati na daukar matakai daban-daban domin kawo cigaba, da karfafa tsaro a jihar, tare da dakile ayyukan ‘yan ta’adda da ke tsallakowa zuwa jihar daga dajin Kainji a jihar Neja.
“Gwamnati ta amince da hada hannu da shugabannin al’umma na cikin gida domin tabbatar da tsaro.
“Muna gode muku kan abin da kuke yi. Amma muna bukatar Sarakuna su yi magana da mutanenmu kan kokarin da dukkanmu muke yi don kare al’ummominmu daga masu kutse.”
Gwamnan ya yi kira da a inganta hadin gwiwa a tsakanin al’umma da hukumomin tsaro domin kare rayuka da dukiyoyi.
Mataimakin Shugaban Majalisar Sarakunan Jihar Kwara, Alhaji Ibrahim Bologi II, wanda shi ne Etsu Patigi, ya yaba wa gwamnan bisa hada gwiwa da su domin tabbatar da tsaro a jihar.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
