‘Yansanda Sun Kama Wani Kan Zargin Yi Wa ‘Yan Bindiga Safarar Makamai A Kano

Rundunar ‘yansandan Jihar Kano ta kama wani mutum mai shekara 28 da ake zargi da kai wa ‘yan bindiga kayayyaki a Karamar Hukumar Bichi.

Kakakin rundunar, SP Abdullahi Kiyawa, ya ce an kama mutumin ne bayan bayanan sirri da mazauna ƙauyen Rimaye suka bayar.

An kama Mohammed Isah Haruna da harsasai 109 na bindigar AK-47, kayan sojoji, hulunan sojoji, katin shaidar soja na bogi da wasu kayayyaki.

‘Yansanda sun ce mutumin ya amsa cewa yana kai wa ‘yan bindiga da ke cikin daji waɗannan kayayyaki.

Kwamishinan ‘Yansandan Jihar Kano, Ibrahim Adamu Bakori, ya yaba wa mazauna yankin bisa ba da bayanan da suka taimaka wajen kama wanda ake zargin.

A halin yanzu, wanda ake zargin yana hannun ‘yansanda, kuma za a gurfanar da shi a kotu bayan kammala bincike.