Hukumar kwastam ta kasar Sin ta fitar da alkaluma a yau Talata da ke nuna cewa, a rabin farko na shekarar nan ta 2026, jimillar cinikayyar shige da fice a kasar Sin ta kai yuan tiriliyan 25.47, wanda ya zama mafi girma a tarihi a wannan lokaci, kuma adadin ya karu da kashi 16.9% idan aka kwatanta da shekarar da ta gabata, inda Sin ta ci gaba da zama kasa ta farko a cinikayyar kayayyaki ta duniya.
A taron manema labarai na ofishin yada labarai na majalisar gudanarwar Sin na yau din, mataimakin shugaban hukumar kwastam ta kasar Sin Wang Jun ya bayyana cewa, gaba daya, cinikin waje na Sin na ci gaba da tafiya kamar yadda ake fata, kuma an samu sakamako mai kyau wajen tabbatar da girmansa, da ingancin tsarinsa a rabin farko na shekarar nan.
Ya ce a yayin da aka samu sakamako mai haske a rabin farko na shekara, ya kamata a kuma lura cewa a rabin karshe na shekarar, cinikin waje na Sin na iya fuskantar wani matsin lamba, amma duk da hakan, Sin na da ingantaccen karfin kirkire-kirkire, da kuzarin gudanar da ayyuka yadda ya kamata, kuma da matakin bude kofa a matsayi mai kyau, don haka tushen cinikin waje yana da karfi, kuma yana da kwarin gwiwa da karfin ciyar da cinikin waje gaba. (Amina Xu)
