Tsohon kocin Manchester United Ruben Amorim na dab da komawa bakin aiki bayan rahotanni sun bayyana cewa ya cimma yarjejeniyar zama sabon kocin AC Milan dake buga gasar Serie A a kakar wasa mai zuwa, ana sa ran kocin mai shekaru 41 wanda ya bar Manchester United a watan Janairu, zai sanya hannu kan yarjejeniyar shekaru biyu a San Siro, inda zai maye gurbin Massimiliano Allegri.
A cewar wani rahoto da jaridar A Bola ta kasar Portugal ta fitar, Amorim ya amince da kwantiragin shekara biyu wanda zai kare a shekarar 2028, amma kuma aj au zabin karin shekara 1 idan ya tabuka abin azo-agani, Amorim ya yanke shawarar hutawa da aikin horarwa zuwa wani dan lokaci a lokacinda ya bar Manchester, amma kuma samun tayi daga Zakarun gasar Zakarun Turai sau 7 din ya sauya ra’ayin tsohon kocin na Sporting CP.
Sharuddan yarjejeniyar sun hada da albashin Yuro miliyan 3 da rabi a kowace kakar wasa da kuma karin alawus-alawus idan ta samu nasarar lashe kowane irin Kofi, tunda farko AC Milan tayi kokarin daukar kocin Al-Ahli mai shekaru 38 Matthias Jaissle, amma kuma ganin cewar Amorim bashida wata kungiya a yanzu ya canza ra’ayinta duba da cewar bata bukatar kashe manyan kudade domin daukar dan kasar Portugal din, yayin da tattaunawar ta kusa kammala, yarjejeniyar tana jiran amincewa daga Gerry Cardinale, shugaban RedBird Capital kuma mamallakin AC Milan, ana sa ran Amorim zai tashi zuwa birnin Milan domin sanya hannu akan kwantiragin.
