Banban Sufeton Ƴansanda na ƙasa, Olatunji Disu, ya amince da naɗin Mataimakin Kwamishinan Ƴansanda, Anthony Placid, a matsayin sabon Kakakin Rundunar Ƴansanda ta ƙasa.
Placid ya maye gurbin tsohon kakakin rundunar, Benjamin Hundeyin. An bayyana hakan ne cikin wata sanarwa da Hundeyin ya fitar a ranar Lahadi daga shalƙwatar rundunar da ke Abuja.
- Sojoji Sun Ƙwato Dabbobi 257 Da Aka Sace A Kano
- An Cafke Wani Mutum Da Ya Lakada Wa Dansa Duka Har Lahira A Edo
Sanarwar ta ce Placid gogaggen jami’in ƴansanda ne da ke da ƙwarewa a fannoni da suka haɗa da gudanarwa, da ayyukan tsaro, da leƙen asiri, da horaswa da kuma ayyukan wanzar da zaman lafiya na ƙasa da ƙasa.
An haifi Placid a ranar 2 ga Disamba, 1970 a Uyo, kuma ya fito ne daga ƙaramar hukumar Nsit Ibom ta Jihar Akwa Ibom. Ya kammala digirin farko a fannin Geography a Jami’ar Uyo, sannan ya samu digirin digirgir a Shari’a (Law and Diplomacy) daga Jami’ar Jos.
Ya shiga rundunar ƴansanda a shekarar 1996 a matsayin Cadet ASP a Nigeria Police Academy, inda aka ba shi muƙami a shekarar 1998. Ya riƙe muƙamai da dama a ciki da wajen ƙasar, ciki har da kakakin ƴansanda na Jihar Adamawa, da muƙamai a ayyukan wanzar da zaman lafiya na Majalisar Ɗinkin Duniya da Tarayyar Afirka.
