Duk da gamuwa da adawa daga cikin gida da waje, gwamnatin Japan tana shirin sassauta dokokin fitar da makamai, kuma tana shirin gyara “Ka’idoji uku na fitar da kayayyakin tsaro” da yadda ake amfani da su, a cikin wannan wata. Wannan shi ne mataki na baya-bayan nan da gwamnatin Japan ta dauka na neman sassauta dokokin fitar da makamai da kuma keta “Kundin tsarin zaman lafiya”, wanda ya kawo barazana ta zahiri ga tsaron yankin.
Sabon salon nuna karfin soja na Japan yana fakewa da sunan “maido da kasa yadda ya kamata” da sauransu, amma ainihin nufinsa har yanzu shi ne karfafa sojoji da fadada makamai. Bisa takardun dokokin kasa da kasa masu ruwa da tsaki, ya kamata Japan ta kwance damara gaba daya, amma bayan yakin duniya na II, ba a kai ga goge tsarin masana’antar sojinta kwata-kwata ba, kuma gwamnatin kasar ta sha sassauta dokokin fitar da makamai sau da yawa.
Sabon shirin gwamnatin Takaichi Sanae yana yunkurin soke kayyadewar da aka yi wajen fitar da makamai wadanda ba na yaki ba, ya kuma ba da izinin fitar da makaman kare dangi, kana da raunana rawar majalisar dokoki ta sa ido. Idan aka aiwatar da shi, to, kasar ta Japan ta sassauta dokokin fitar da makamai daga dukkan fannoni ke nan.
Manazarta sun bayyana cewa, a halin yanzu kasar Japan na fuskantar rashin saurin ci gaban tattalin arziki da karuwar matsin lamba a fannin kudi, don haka, masu ra’ayin rikau na kasar suna neman cimma muradun inganta tattalin arziki da karfafa masana’antun soji da kuma karfafa kawance da kasashen waje, ta hanyar sassauta fitar da makamai.
Kasashen duniya sun kara fahimtar cewa, matakan da Sin ta dauka, ciki har da hana fitar da kayayyakin da amfanin fararen hula da kuma ake iya amfani da su a bangare aikin soja zuwa Japan, suna da muhimmanci kuma sun zama dole don dakatar da Japan daga “sake komawa ga nuna karfin soja” da hana yunkurinta na mallakar makaman nukiliya, da kuma kiyaye zaman lafiyar shiyyar da ma duniya baki daya. (Bilkisu Xin)
