Samun Rarar Kudin Ciniki Ba “Laifi” Ba Ne, Hadin Gwiwa Da Cin Moriya Tare Ita Ce Mafita Ga KowaKwanan nan, wani dan siyasar Amurka ya gurbata gaskiya game da yanayin cinikin kasar Sin, inda ya ayyana ci gaban Sin a matsayin “barazana”, kuma ya jirkita zabin kasuwa, cewa wai “Sin tana yunkurin neman rarar kudin ciniki fiye da saura”.
Amma gaskiyar lamari ita ce bangaren Sin ba ya neman samun rarar kudin ciniki fiye da saura da gangan, kuma yana adawa da duk wani nau’in matakan haraji na kare kai. Gibin ciniki yana faruwa ne bisa tarin dalilai kamar bukatun kasuwa da takarar kasuwa a duniya.
Yadda Sin ke samun rarar kudin ciniki na nuna cewa, Sin tana da cikakken tsarin masana’antu mai inganci, haka kuma sakamako ne na kwaskwarimar da ake yi a bangaren rarraba ayyuka da tsarin ciniki na duniya. Karuwar cinikin fitar da kayayyaki na Sin ya samo asali ne daga karuwar karfinta ta fannin kirkire-kirkire, kana daga bukatun kasashe na samun ci gaba ba tare da gurbatta muhalli ba da ci gaban masana’antun duniya.
A bangaren rarraba fa’idodin ciniki kuwa, rarar kudin ciniki da Sin ta samu na amfanar da mabanbantan bangarori. Alal misali, a shekara ta 2025, kamfanoni masu jarin waje sun ba da gudunmawar kashi 27% na cinikin fitar da kayayyaki zuwa ketare na Sin, kuma yawan kudin fannin ya kai kashi 16% na rarar kudin ciniki da Sin ta samu, kana saurin karuwar rarar kudin ciniki da riba da wadannan kamfanoni suke samu ta fi na kamfanonin cikin gida.Dadin dadawa, ko da yake Sin tana samun rarar kudi a bangaren cinikin fitar da kayayyaki zuwa ketare, a daya bangaren tana yawan kashe kudi a bangaren shigo da hidimomi daga ketare, da amfani da asusun jari da na hada-hadar kudade, kuma rarar kudin ciniki da Sin ke samu a yau da kullum ya kai kusan kashi 3.7% na GDPnta, adadin da kasa da kasa ke ganin ba matsala da shi, kuma ba a gano rashin daidaiton ciniki tsakaninta da sauran kasashe ba.
A cikin shekaru 5 da suka gabata, jimillar kayayyakin da Sin ta shigo daga ketare ta wuce yuan tiriliyan 90, wanda ya nuna cewa Sin ba wai kawai “cibiyar samar da kayayyaki ta duniya” ba ce, har ma “kasuwar duniya” ce. Har ila yau, Sin ta riga ta aiwatar da manufar soke haraji kan kayayyakin da take shigowa daga kasashe 63, kuma jimillar harajin ya ragu zuwa kashi 7.3%. Sin ita ce babbar kasa ta farko a duniya da ta aiwatar da manufar soke haraji kan dukkanin kayayyakin da take shigowa daga dukkan kasashen Afirka da suka kulla huldar diplomasiyya da ita, da kuma dukkan kasashe mafi karancin ci gaba da ke da huldar da ita.
Sakamakon manufar, a watanni Mayu da Yuni na bana kadai, kudin kayayyaki da kasar Sin ta shigo daga kasashen Afirka ya kai dala biliyan 28.5, wanda ya karu da kashi 23.5% bisa na makamancin lokacin bara. Ban da wannan kuma, a rabin farkon wannan shekara, kudin kayayyakin da kasar ta Sin ta shigo daga Nijeriya ya kai biliyan 2.25, wanda ya karu da kashi 81% bisa na makamancin lokacin bara.
Bugu da kari, bikin baje kolin kayayyakin da ake shigowa da su kasar Sin ko CIIE, shi ne bikin baje koli irinsa na farko a duniya wanda ya mayar da hankali kan shigowa da kayayyaki, kuma kawo yanzu an gudanar da shi sau 8 cikin nasara, inda darajar jimillar kwangilolin shigar da kayayyaki Sin da aka cimma ta wuce dala biliyan 580.Tushen gibin ciniki da Amurka ke fuskanta ya samo asali ne daga kanta, ciki har da rashin isasshen kudin ajiya, da koma bayan masana’antu, kana da kayyade fitar da fasahohin zamani zuwa Sin, idan har Amurka ba ta gyara manufofinta, lallai da wuya ta daidaita wannan matsala.
Game da hakan, kakakin ma’aikatar harkokin wajen kasar Sin Guo Jiakun ya bayyana kwanan nan cewa, “Dole ne Sin da Amurka su hada kai don tabbatar da daidaiton da shugabannin kasashen biyu suka cimma, da magance matsaloli ta hanyar tattaunawa bisa daidaito, da mutunta juna da cin moriya tare, su kuma kiyaye kyakkyawan yanayin da suke samu a fannin kasuwanci da tattalin arziki.”Sin ba ta da niyyar neman samun rarar kudin ciniki, kuma ba za ta dakatar da bude kofarta ga ketare ba duk da cewa wasu sun “kafa mata shingaye”.
Daga Afirka zuwa Latin Amurka, daga kudu maso gabashin Asiya zuwa Gabas ta Tsakiya, kasashe da yawa suna tabbatar da cewa yin ciniki da Sin dama ce a maimakon barazana. Samun rarar kudin ciniki ba “laifi” ba ne, cin moriya da samun nasara tare ita ce mafita ga kowa, kuma Sin za ta dage wajen bude kofarta ga ketare a ko da yaushe. (Marubuciya: MINA)
