Sanatan da ke wakiltar Yobe ta Gabas, Mustapha Musa, ya janye daga takarar 2027 tare da bayyana goyon bayansa ga Gwamna Mai Mala Buni a matsayin wanda yake so ya gaje shi a Majalisar Dokoki ta Ƙasa.
Sanatan ya bayyana hakan ne a cikin wata sanarwa, inda ya ce ya yi daidai da shawarar shugabannin jam’iyyar APC da kuma tsarin siyasar da aka tsara domin zaɓen 2027. Ya ce ya janye gaba ɗaya daga takarar, tare da jaddada cewa ba zai nemi wata kujera ba.
Haka kuma, ya umarci magoya bayansa da su daina yaɗa duk wani kayan yaƙin neman zaɓe da ke danganta shi da kowace takara. Ya kuma taya tsohon Sakataren Gwamnatin Jihar, Baba Mallam Wali, murna bayan da ya zama zaɓin shugabannin jam’iyya a matsayin ɗan takarar gwamna.
Sanata Mustapha ya nuna godiyarsa ga Gwamna Buni da kuma Ministan Harkokin ƴansanda, Ibrahim Geidam, bisa jagoranci da goyon bayan da suka ba shi, wanda ya taimaka masa tun daga muƙaminsa na farko har zuwa zama Sanata.
Masu sharhi kan harkokin siyasa sun bayyana cewa wannan mataki na nuna yunƙurin haɗin kai da daidaito a cikin jam’iyyar APC a Jihar Yobe, yayin da ake shirin tunkarar zaɓen 2027.
