Manajan daraktan majalisar tattalin arzikin duniya (WEF) Maroun Kairouz ya bayyana cewa, a yayin da ake fama da hargitsin siyasar yankuna na duniya da kuma karuwar barazanar wargajewar tattalin arziki, sauyin da kasar Sin ta yi daga turbar samun ci gaba cikin hanzari sosai zuwa ga samun ci gaba mai inganci a matakin koli, yana samar da kuzari tare da kwanciyar hankali da aka fi bukata ga tattalin arzikin duniya.
Kairouz ya bayyana sauyin a matsayin mai muhimmanci da yake da muradin samar da karin ci gaba mai dorewa da juriya, kana ya yaba wa gyare-gyaren tsari da kasar Sin ke gudanarwa a halin yanzu, kamar yadda ya bayyana a cikin wata hira da aka yi da shi a rubuce.
Ya kara da cewa, sauyin yana nuna kara mayar da hankali kan kirkire-kirkire, da yawan gudanar da aiki da kuma kwanciyar hankali na dogon lokaci. Kuma alamu masu kyau na wannan sauyi sun bayyana musamman a fannin makamashi. A shekarar 2024, jarin da kasar Sin ta zuba a fannin makamashi mai tsafta ya kai dala biliyan 818, wanda ya karu da kashi 20 cikin dari idan aka kwatanta da na shekarar da ta gabata.
Haka nan ya ce, a halin yanzu, tattalin arzikin fasahar zamani, wanda ya kunshi kirkirarriyar basira (AI) da ayyukan masana’antu da fasahohin zamani a matakin ci gaba mai zurfi, yana matukar taka rawar gani wajen inganta ayyuka a fannoni da dama na kasar Sin.
Kazalika, Kairouz ya ce, wadannan gyare-gyare ba wai kawai suna karfafa juriyar tattalin arzikin kasar Sin ba ne kawai, har ma suna samar da sabbin damammaki na duniya a fannin makamashi mai tsafta, fasaha da cinikayya a shekarar 2026 da kuma gaba. Wannan ci gaban yana taimakawa wajen magance dimbin kalubalen da ake fuskanta a cikin yanayi mara tabbas da duniya ke kara-kaina a ciki. (Mai Fassara: Abdulrazaq Yahuza Jere)
Discussion about this post