A lokacin da launin sararin samaniya ya sauya zuwa ruwan hoda a wani gari dake Australiya, wata mazauniyar garin Tammy Szumowski, ta yi zaton tashin duniya ne ya zo.
“Na yi kokari na nutsu ban rude ba, na gaya wa ‘ya’yana cewar: “Ba wani abin damuwa ba ne,” kamar yadda ta shaida wa manema labarai.
“Amma a cikin raina cewa nake, kam bala’i, me ke shirun faruwa ne haka?”
Daga baya an gano cewa wani haske ne yake tasowa daga wata gonar wiwi da ke wajen garin na Mildura a Arewacin Victoria.
Amma baya ga Misis Tammy, akwai wasu mazauna garin da su ma suka shiga halin dimuwa na ganin wannan lamari, har suna tunanin ko wasu bakin halittu ne suka kutso duniya, ko kuma wani katon dutse ne yake wucewa ta sararin samaniyar.
“Mama da baba suna magana a waya yana ce mata: ‘Gara na yi sauri na shanye shayina saboda duniya za ta tashi.”
“Sai mama ta ce: ‘To me shan shayi zai kara maka idan har tashin duniyar ne ya zo.’
“Shi ma wani dan garin, Nikea Champion, ya ce da fari ya zaci wata ne ya kara girma kuma haskensa ya yi bau a lokacin da ya ga launin samaniyar ya sauya.”
“Babu irin tunanin da ban yi ba na batun tashin duniya.”
