Shekaru shida bayan zanga-zangar #EndSARS, ’yan Nijeriya na ci gaba da tunawa da yadda dubban mutane suka yi ƙoƙari wajen neman kawo ƙarshen cin zarafin jama’a da jami’an ’yansanda da kuma rashin kyakkyawan shugabanci.
Zanga-zangar ta fara ne a watan Oktoban 2020, kafin ta bazu zuwa jihohi sama da 20.
Matasa sun buƙaci a yi adalci, a ɗora wa masu laifi alhaki, tare da rushe rundunar ’yansanda ta musamman mai yaƙi da fashi da makami, wato SARS.
Ga muhimman abubuwa guda takwas da suka faru a lokacin zanga-zangar:
1. Harbin masu zanga-zanga a Lekki Toll Gate: A ranar 20 ga watan Oktoban 2020, sojoji sun buɗe wa masu zanga-zanga a Lekki Toll Gate da ke Legas wuta, lamarin da ya ja hankalin duniya.
2. Zanga-zanga a wasu jihohin Nijeriya: Zanga-zangar ta bazu zuwa jihohi da dama, inda ’yan Nijeriya suka buƙaci gyara a rundunar ’yansanda da ingantaccen shugabanci.
3. Tallafa wa jama’a: Fitattun mutane da sauran ’yan Nijeriya sun tallafa wa masu zanga-zangar da abinci, ruwa, kayan agajin gaggawa da sufuri.
4. Jan hankalin duniya: Taken #EndSARS ya shahara a duniya, inda fitattun mutane da kafafen yaɗa labarai na ƙasashen waje suka nuna goyon bayansu ga masu zanga-zangar.
5. Hoton Aisha Yesufu: Wani hoto da ya bazu na fitacciyar ’yar gwagwarmaya, Aisha Yesufu, ta ɗaga hannunta sama ya zama alamar jarumta da yin tsayin daka wajen neman adalci.
6. Sanya dokar hana fita: Gwamnatocin wasu jihohi sun sanya dokar hana fita yayin da rikici da tashin hankali suka ɓarke.
7. Kisan jami’an ’yansanda: An kai wa wasu jami’an ’yansanda hari tare da kashe a lokacin rikicin.
8. Lalata kadarorin gwamnati da na jama’a: An kai hare-hare kan gine-ginen gwamnati, ofisoshin ’yansanda, gidajen yaɗa labarai da wuraren kasuwanci, yayin da aka fasa wasu shaguna.
Shekaru shida bayan faruwar lamarin, zanga-zangar #EndSARS na ci gaba da kasancewa muhimmin tarihi a Nijeriya, tare da tunatar da jama’a buƙatar yin adalci, gaskiya, ɗora wa masu laifi alhaki da kawo ƙarshen cin zarafin jama’a da jami’an ’yansanda.
