Hukumar Kula da Harkokin albarkatun mai (NMDPRA) ta bayyana cewa yawan shigo da fetur zuwa Nijeriya ya karu da kashi 59.5 cikin 100 a watan Mayun 2026, duk da cewa buƙatar man a cikin gida ta ragu zuwa lita miliyan 46.3 a kullum daga lita miliyan 51.1 da aka samu a watan Afrilu.
A cewar rahoton hukumar na watan Mayu, yawan fetur da ake shigowa da shi ya kai lita miliyan 5.9 a rana, yayin da jimillar wadatar fetur a ƙasar ta ƙaru zuwa lita miliyan 47.4 a rana. Sai dai wannan adadi har yanzu bai kai matakin buƙatar ƙasa baki daya na lita miliyan 50 a kullum ba.
Rahoton ya nuna cewa matatar mai ta Dangote ta taka muhimmiyar rawa wajen samar da fetur a cikin gida, inda ta yi aiki da ƙarfin kashi 101.25 cikin 100, ta samar da lita miliyan 44.7 na fetur a rana, tare da samar da lita miliyan 41.5 ga kasuwar cikin gida. A gefe guda kuma, matatun mai na gwamnati da ke Fatakwal, Warri da Kaduna sun ci gaba da kasancewa a rufe a duk tsawon watan.
NMDPRA ta kuma bayyana cewa an dakatar da shigo da dizel daga ƙasashen waje a watan Mayu bayan matatar Dangote ta ƙara yawan samar da dizel zuwa lita miliyan 18.8 a rana. Haka kuma, wadatar man jiragen sama ta ƙaru zuwa lita miliyan 3.6 a rana, yayin da amfani da shi ya kai lita miliyan 3.1.
Hukumar ta ce ana samun ci gaba a manyan ayyukan bututun iskar gas na ƙasa, inda aikin bututun AKK ya kai kashi 94.3 cikin 100 na kammalawa. Ta bayyana alƙaluman watan Mayu a matsayin shaida ta sauye-sauyen da ake samu a ɓangaren makamashi, ciki har da ƙaruwar samarwa a cikin gida, da rage dogaro da shigo da kayayyakin mai daga waje da kuma bunƙasar tattalin arziƙi.
