A ranar 17 ga watan nan da muke ciki, wani jirgin ruwan yakin Japan mai suna “JS Ikazuchi” ya ratsa mashigin tekun Taiwan na kasar Sin, inda ya shafe kusan sa’o’i 14.
Idan ba a manta ba, a kwanakin baya, firaministar Japan din ta furta wasu kalamai kan yankin Taiwan, wadanda kasar Sin ta bayyana rashin amincewarta da su, ta kuma nemi Japan ta gyara kuskurenta. Sai dai maimakon kokarin gyara kuskure da neman a zauna lafiya, Japan tana ta aikata abubuwan da suka sabawa neman zaman lafiya. Wucewar wannan jirgi da ya zo a makamanciyar ranar da Japan din ta tilasta cimma yarjejeniyar da ta kai ta ga mamaye yankin Taiwan, ya nuna karara cewa takalar fada ce kawai.
Duniya na fama da tarin kalubule na yake-yake, inda wadanda ba su ji ba, ba su gani ba, ke dandana kudarsu. Maimakon hada kai da sassan duniya domin yayyafawa yanayin ruwan sanyi, da alama Japan na son amfani da wannan dama wajen kara hargitsa duniya da kara nuna cewa, ba ta dauki darasi daga abubuwan da suka faru a baya ba.
Amincewa da manufar kasancewar Sin daya tak a duniya da kasancewar Taiwan wani bangare da ba zai iya ballewa daga Sin ba, ita ce tushen dangantakar Sin da kowace kasa a duniya. Kuma dukkan kasashe sun san cewa, batun Taiwan batu ne mafi muhimmanci ga kasar Sin da bai kamata duk mai kaunar zaman lafiya ya rika takala ba.
Japan tana ta karfafa karfinta na soja a baya-bayan nan bisa abun da take kira barazana daga makwabta, amma shin wace ce ainihin baranzanar, wadda ake takala ko kuma mai takala?Ko a kutsen da Japan ta yi wa Sin shekaru 80 da suka wuce, Sin ba ta bayar da kai ba duk da illolin da kutsen ya haifar, sai ma mika wuya da Japan din ta yi daga bisani. To me ya sa Japan ke ganin za ta iya kai labari a yanzu? Ai duniya ta ci gaba, kuma kai ya waye, don haka ba za a nade hannu a kyaleta ta yi abun da ta ga dama ba.
A matsayinsu na makwabta, kuma abokan cinikayya, kamata ya yi a ce an samu maslaha, an yi watsi da ra’ayin rikau. Tun da yanayi ya sauya, ya kamata dabaru da ra’ayi su sauya. Babu abun da matakan soja ke haifarwa sai wahalhalu da asara, kuma hakan sam ba su dace da duniyarmu ba.
Lokaci bai kure ba, Japan na iya sauya dabarunta da bin daidaitacciyar hanya domin a zauna lafiya, a ci moriya tare ta yadda al’umma da daukacin yankin za su amfana. (Faeza Mustapha)
