A wannan makon mun nemi jin ta bakin masu karatunmu ne, kan yadda fasahar zamani ta AI (Artificial Interilligence) ke taka rawa a rayuwarsu. Ga dai ra’ayoyin kamar yadda Muhammad Bakir da Sani Anwar suka kawo mana.
Amina Bello daga Jihar Kaduna
AI (Artificial Intelligence), na da tasiri sosai a harkokina na yau da kullum da suka hada da:
1- Kasuwanci: AI na taimaka min wajen rubuta tallace-tallace, tsara tambarin kasuwanci da kuma amsa tambayoyin kwastomomi cikin sauri.
2- Ilimi: Yana taimaka min, wajen yin bincike, fahimtar darussa, da kuma koyon sabbin abubuwa.
3- Sadarwa: AI na iya fassara min harsuna, gyara rubutu da kuma taimakawa, wajen rubuta sakwanni ta imel. Kamar a kasuwancina na sayar da turare da kayan kamshi, AI na taimaka min wajen: Rubuta kyawawan tallace-tallace.
Kirkirar tambari da hotunan talla.
Ba da ra’ayoyin yadda za ka kara yawan kwastomomi.
Shirya sakwannin WhatsApp, Facebook da Instagram, domin tallata kayanka.
Muktar Anwar
Babu shakka, AI kan taimaka min ta fuskoki mabanbanta da suka hada da batun bincike na ilimi, mu’amaloli da suka shafi harkar samun ‘yan sulalla da sauran makamantansu.
Sai dai, dogara da AI kadai kacokan ba tare da tuntubar wasu majiyoyi tabbatattu ba, na da ‘yar matsala musamman a kan abin da ya shafi bincike na ilimi kai-tsaye, kasantuwar wasu lokutan a kan samu wasu iyan kura-kurai tattare da ita.
Yusuf Muhammad, daga Jihar Kano
Kirkirarriyar basirar Dan’adam ta zamani (Artificial Intelligence), ta yi matukar tasiri a rayuwata da kuma rayuwar mutane da dama.
Wata hanya ce ta koyar da bincike cikin manyan kayan aikin bincike da koyo mafi ci gaba da aka taba samu. Tana taimaka min, wajen yin tunani mai zurfi, koyon abubuwa cikin sauri da kuma gina sabbin fasahohi cikin sauki da inganci.
Buhari Abdullahi daga Jaji Jihar Kaduna
Ina amfani da AI musamman a bangaren kasuwanci na zamani (cryptocurrency), AI yana taimaka min wajen yin nazarin kasuwa ta hanyar binciken farashin kudaden dijital, gano yanayin canjin kasuwa da kuma taimaka min, wajen yanke shawara bisa matakan da zan dauka.
Haka kuma, akwai wasu manhajoji da ke amfani da AI wajen sa ido kan kasuwa, gano yiwuwar hadari da kuma gudanar da ciniki ta otumatik, bisa ka’idojin da mai amfani ya tsara.
Duk da haka, AI ba shi da ikon tabbatar da riba ko hasashen kasuwa daidai-wadaida a kowane lokaci, saboda kasuwar (cryptocurrency), na da matukar sauyin farashi da hadari.
Hamid Awwal, daga Jihar Kwara
Amatsayina na dalibi, AI yana taimaka min wajen karatu da yin bincike cikin sauki da kuma karancin lokaci, musamman wajen yin ‘project’, AI yana taimaka min sosai wajen samun littattafai, wadanda suka danganci fannin da nake bukata, hatta a karatuna yanzu na fi fahimtar karatu idan na yi amfani da AI, saboda yana yin bayani da kyau yana kuma kawo misalai sosai, sannan kuma yana amsa duk tambayin da za ka yi masa ba tare da bata lokaci ba.
Ibrahim Aminu daga Zaria Jihar Kaduna
AI (Artificial intelligence), na da tasiri mai girma a ayyukan kasuwancina na yau da kullum, domin yana taimaka min wajen yin aiki cikin sauri da inganci.
Mussaman a fannin kafafen yada labarai, daukar hoto da tallan kasuwancina, ina amfani da ita wajen kirkirar taken rubutu da rubuta rahotanni da kirkirar dabarun tallan kasuwanci da gyara hotuna da bidiyo da kuma taimaka min wajen kai wa ga abokan ciniki da dama ta yanar yanar gizo.
Haka kuma, AI na taimaka min ta hanyar ba da amsa da sauri ga tambayoyi da kuma taimaka wa kasuwanci su fahimci abin da abokan ciniki ke so.
A cikin kasuwancina na buge-bugen takardu, AI na taimakawa wajen tsara ‘flyers, banners’, katin kasuwanci, takardun shaida, da sauran kayan tallace-tallace cikin sauki. Zai iya ba da shawarar tsarin zane, gyara kuskuren rubutu, inganta ingancin hoto da kuma sarrafa ayyuka ba ta re da bata lokaci ba.
Ta hanyar amfani da kayan aikin AI, zan iya kara yawan aiki, inganta ingancin aikina, jawo hankalin abokan cinikai da yawa da kuma yanke shawarar kasuwanci mafi kyau, bisa bayanai da yanayin kasuwa da take bayarwa.
Omar Abbas Sa’ad, daga Jihar Nasarawa
Yadda AI ke taimaka min wajen saukaka ayyukana na yau da kullum sun hada da kamar haka:
Sana’o’i uku nake yi a lokaci daya: Dan jarida, Telan zamani, kuma ina harkar gidaje. Abin da ya hada wadannan sana’o’i duka wuri guda a yau shi ne, amfani da fasahar AI.
A matsayina na dan jarida, AI ya zama abokin bincikena da kuma rubutuna. Idan na yi tunanin abin da nake so na yi, AI yana taimaka min wajen fadada shi tare da samun cikakken bayanai, kan abin da nake son aiwatarwa. Shi ya sa, abin da zai dauke ni tsawon awanni, idan na yi amfani da AI cikin ‘yan mintuna na kammala shi.
Kazalika, a matsayina na Telan zamani, AI yana matukar taimaka min, wajen fitar sabbin kaloli tare da zane iri daban-daban na dinkunan zamani. Sannan, AI yana taimaka min wajen kirkirar zane-zane, wadanda ma ban taba zaton zan iya samun su ba.
Haka zalika, yana taimaka min wajen binciko zane-zanen da sauri tare da gwada ra’ayoyi abokanan cinikina da kuma daidaita gaba da baya kafin a dinka.
Sannan, a matsayina na mai harkar cinikin gidaje, AI yana taimaka min, wajen yin tunanin yadda zan tallata hajata. Duk wata matsala da na nemi taimakonsa a kai, kama daga kan gidaje, wuri ko abokin ciniki, ba tare da wani bata lokaci ba, yana ba ni mafita mafi kyau.
Haka nan, batun isar da sako ga abokan ciniki tare da jawo hankalinsu. Yana kuma taimaka min wajen shirya ayyuka ta hanyar da za ta yi magana kai tsaye da masu saye da kuma masu zuba jari.
